Ж.Мөнхтөр: Энэ жил л анх удаа улс, бүсийн наадмаас анхны айргаа хүртлээ

-Эрлийз бага насны ангилалд таны хонгор халзан даага айргийн гуравт хурдалсан. Баяр хүргэе?
-Баярлалаа. Халзан даагыг Төв аймгийн Баянцогт сумын уугуул “шар” хэмээх Отгонбаяр гэдэг залуу уяж, хавар Улаанбаатарыг тойрсон уралдаануудад амжилттай сайн давхиулж байсан. Морь сонирхогчид Баянжаргалын Магнай халтарын унаган эзэн гэдгээр нь андахгүй байх.
-Халзан үрээнийхээ удам угшлыг танилцуулаач?
-Эцэг нь Дон үүлдрийн адуу. Харин эх нь Дорноговийн Иххэт сумын уугуул, МУ-ын Алдарт уяач Нарангэрэл агсны хүү Ононгийн адууны гүү бий. Би тэднийхээс нэлээд хэдэн гүү авахад дунд нь ирсэн. 
-Онон гэхээр МУ-ын Алдарт уяач Нарангэрэл гуайн хүүхэд байх нь ээ дээ?
-Тийм. Би азарга аваад зүүн талаас хэдэн гүү авсан юм. Тэгэхэд тэр дунд ирсэн адуу байгаа юм. Халзан даага энэ жил 11 уралдахдаа арав түрүүлж айрагдсан. Ганцхан нийслэлийн тэргүүн хүлэг шалгаруулах “Хангарьд-2014” уралдаанд л айрагдаж чадаагүй.
-Улсын наадмын дараа аль бүсэд уралдсан бэ?
-Баянхонгор аймагт болсон говийн бүсийн уралдаанд аман хүзүүдсэн шүү дээ. Энэ жил үндсэндээ улс, бүсийн наадмаас хоёр айраг аваад байгаа юм.
-Таны хувьд хэзээнээс хурдан хүлгийн уяа тааруулж байгаа вэ?
-Өө, удаж байнаа. 1997-98 оны үеэс л хурдан морь сонирхож байгаа. Энэ жил л анх удаа улс, бүсийн наадмаас анхны айргаа хүртлээ. Аймаг, сумын наадмаас бол айраг, түрүү авч байсаан.
-Цолтой юу?
-Цолгүй ээ. Өөрөө уядаггүй болохоор цол авч төвддөггүй.
-Морь уях төрийн хэрэгт шимтэж буй танд амжилт хүсье.

"Тод магнай" сэтгүүл №58