"Тод магнай" сэтгүүлийн шинэ дугаар гарлаа

"Тод магнай" сэтгүүлийн 59 дэх удаагийн дугаар Сүхбаатар, Баянхонгор, Төв, Хэнтий, Увс зэрэг олон аймгийн уяачид, хурдан морины амжилт, алдрын түүхийг тусгаснаараа онцлог болж чадсан. Энэ удаагийн дугаарын зочин хойморт Сүхбаатар аймгийн Сүхбаатар сумын уугуул, УИХ-ын гишүүн асан, аймгийн Алдарт уяач Рэнцэнгийн Буд уригдан оролцож, адуутай нөхөрлөсөн он жилүүдийнхээ талаар амтат хуучийг дэлгэлээ. Алтан-Овооны их тахилга наадмаас амжилтын гараагаа эхлэн төрийн зарлигт наадмаас гурван түрүү, зургаан айраг хүртсэн тэрээр өөрийн бий болгосон торгон сүргийн талаар тун сонирхолтой мэдээллийг дуулгасан шүү.
Монгол хүний тэсвэр хатуужил, монгол морины гайхамшгийг мэдрүүлэхээр зургаан сарын өмнө аянд гарсан “Морьтон Монгол” төслийн залуус 10.394 км зам туулан, аяллаа өндөрлөлөө. Монгол түмний бахархалт хөвгүүдийг хэрхэн угтан авсан тухай фото сурвалжлагыг та бүхэн 60-62 хуудаснаас тольдоорой. Аяллын дэлгэрэнгүй сурвалжлага мэдээллийг бид дараагийн дугаараараа хүргэх болно.
Залуу уяачдад гарын  авлага болдог “Уяаны эрдэм” буланд энэ удаа шинэ цагийн  адууг хэрхэн арчлах талаар зөвлөсөн бол  Тод манлай уяач Б.Бат-Өлзий өвлийн уяа сойлго арчилгааны талаар тун хэрэгтэй мэдээллийг дуулгасан шүү. Та бүхэн заавал уншаарай.
Үүсч байгуулагдсаныхаа түүхт ойг тэмдэглэн өнгөрүүлсэн сумдын баяр наадмаас хийсэн цуврал сурвалжлагуудыг хүргэж буй “Аяны богц” энэ удаа Төв аймгийн Угтаалцайдам сумын 90 жилийн ойн баяр наадмын мэдээллийг хүргэхээр бэлтгэлээ.
Харин  “Холбоод” буланд говийн бүсийн наадамд гарамгай амжилт гаргасан Баянхонгор аймгийн Баян-Овоо сумын хийморилог уяачид саатсан байгаа.
Салбарын тулгамдсан асуудлуудыг тусгадаг “Чөлөөт индэр” булан энэ удаа “Монгол адууны стандарт”-тай холбоотой мэдээллийг онцоллоо. Уншигч та бүхэн 2010, 2014 оны монгол адууны стандартыг харьцуулан үзэхийн зэрэгцээ энэ тухай Монголын мал зүйч, үржүүлэгчдийн холбооны гүйцэтгэх захирал, Гавьяат мал зүйч Д.Самданжамц ямархан бодолтой байгааг 80-81 нүүрнээс уншаарай.
Энэ мэтчилэн дурдаад байвал мэдээллийн өргөн агууламжтай “Тод магнай”-н шинэхэн дугаараа "Интер" номын салбар дэлгүүрүүд болон сонин, сэтгүүл борлуулах цэгээс, мөн редакцийн 94082992, 95092992 дугаарын утсанд холбогдож аваарай.