Дараалсан том барилдаанууд болно

А.Тэлмэн
2014 оны 11-р сарын 17 -нд

Энэ сарын сүүлийн хэсэгт гурван ч том барилдаан болохоор болжээ. Эдгээр барилдаануудын хуваарь болоод урд жилүүдийн түүхээс уншигчдадаа хүргэе.
11 дүгээр сарын 20 буюу Пүрэв гараг
Төв аймгийн ургацын баярын барилдаан 12 цагаас Монгол бөхийн өргөөнд болно. Барилдаанд улс аймгийн алдар цолтой хүчит 224 бөх зодоглох бөгөөд бусад барилдаанаас харьцангуй эрт буюу 12 цагаас эхлэх юм. Урд өмнө Төв аймаг болоод МБӨ-д болсон барилдаанууд улсын өсөх идэр начин Р.Пүрэвдагва, улсын заан Б.Батмөнх, аймгийн хурц арслан А.Алтанхуяг нар түрүүлж байсан билээ.
11 дүгээр сарын 23 буюу Ням гараг
Монгол бахархлын өдрийн барилдаан 14 цагаас Монгол бөхийн өргөөнөө болно. Барилдаанд улс аймгийн алдар цолтой 128 бөх зодоглон барилдах юм. Их эзэн Чингис хааны эснэсний өдрийг тохиолдуулан зохиох болсон тус барилдаан ийн гурав дахь жилдээ болох гэж байна. 2012 онд анх зохион байгуулахад 256 бөх зодоглож улсын заан Ч.Санжаадамба түрүүлж, улсын харцага Ц.Содномдорж үзүүрлэж, тухайн үеийн улсын арслангууд болох Г.Эрхэмбаяр, П.Бүрэнтөгс нар их шөвөгт шалгарч, Түвдэндоржийн Өсөх-Ирээдүй, Өлзийтогтохын Бат-Орших, Баатархүүгийн Пүрэвсайхан, Оюуны Гантулга нар дунд шөвөгт шалгарч байсан билээ.2013 онд хоёр дахь удаагаа зохиоход 128 бөх барилдаж үнэн хүчит, саруул сайжрах заан Чимэдрэгзэнгийн Санжаадамба хоёр удаагаа түрүүлж, улсын аварга Сүхбаатарын Мөнхбат үзүүрлэж, улсын арслан Хадбаатарын Мөнхбаатар, улсын харцага Өлзийтогтохын Бат-Орших нар их шөвөгт шалгарч байлаа. Дунд шөвөгт улсын арслан Пүрэвийн Бүрэнтөгс, улсын гарди Батнасангийн Гончигдамба, улсын харцага Түвдэндоржийн Өсөх-Ирээдүй, улсын начин Батмөнхийн Сангисүрэн нар шалгарч байв. Дэлгэрсайханы Амарсайхан хэмээх уран барилдаантай аймгийн арслан гарди Ж.Бат-Эрдэнийг хаяж шуугиулсан бол тавын даваанд харцага Ө.Бат-Орших арслан Бүрэнтөгсийг бөхийн бүх төрлөөр цэвэр ялахаар хавирч байсныг уншигчид маань санаж буй нь лавтай.
11 дүгээр сарын 26 буюу Лхагва гараг
Монгол улсыг тунхагласны 90 жилийн ойн барилдаанд 14 цагаас Монгол бөхийн өргөөнд болно. Уг барилдаанд уламжлал ёсоор улс аймгийн алдар цолтой 256 бөх зодоглон барилддаг. Зарим жил өнжиж байсан ч улсын наадам, цагаан сарын барилдааны дараа орохуйц нэр хүнд, чансаатай болдог уг барилдаанд дархан аварга Б.Бат-Эрдэнэ зургаан удаа түрүүлж үнэмлэхүй амжилт тогтоосон бол дархан аварга Г.Өсөхбаяр гурвантаа манлайлж байжээ.
Өнгөрсөн жил уг барилдаан дуулиан ихтэй болж залуу аварга С.Мөнхбат гурвын даваанд а.н Т.Батсайханыг амлаж мэхээ дутуу хийгээд унасан бол арслан Х.Мөнхбаатарыг Дорнодын Х.Алтансүх алдарт гар ачаагаараа давж байв. Нацагсүрэнгийн Золбоо залуу арслан П.Бүрэнтөгсийг оноолтын даваанд давж, тавын даваанд Б.Пүрэвсайхан Б.Сугаржаргал нар, зургаагийн даваанд Ц.Содномдорж Б.Пүрэвсайхан нар тунаж байлаа.
Их шөвөгт заан Б.Батмөнх аваргыг дархан зайлаагаараа давж үзүүрт наадмаар давсан Ч.Санжаадамба заанд өвдөг шороодож шинэ цолтойгоо үзүүрлэж байсан билээ. Өнөө жилийн барилдаанууд ч дурсах юмтай, дуулгах сонинтой болох байх аа. Нэг сураг дуулгахад улс тунхагласны барилдаанд аварга Г.Эрхэмбаяр зодоглохоор бэлтгэлээ чамбайруулж байна лээ.
Т.Түмэндэмбэрэл

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна