Аймгийн Алдарт уяач Н.Отгонбаяр: Хар үрээ маань хоёр дахиа түрүүллээ

-Сумынхаа 90 жилийн ойн баяр наадамд шүдлэн түрүүлгэсэн танд баяр хүргэе?
-Баярлалаа. Манай сумын 90 жилийн ойн баяр наадам өргөн дэлгэр сайхан болсоон. Ах дүү Тод манлайгууд маань ирж оролцсон энэхүү наадамд миний унаган үрээ  түрүүллээ. Хар үрээ маань ноднин даагандаа аймгийнхаа болон сумынхаа баяр наадамд түрүүлж байсан юм. Энэ жил сумынхаа наадамд хоёр дахиа түрүүллээ.
-Даагандаа хэд уралдсан юм бэ?
-Даагандаа тав уралдаж тав түрүүлсэн. Баян Богд хайрханы тахилга, Хөхморьт суманд болсон ургийн баяр, аймгийн Алдарт уяач Батжаргалын Нандин халиун үрээний мялаалга мөн дээр хэлсэнчлэн аймаг, сумын баяр наадамд тус тус түрүүлсэн. Ер нь уралдсан болгондоо түрүүлж байсан.
-Тэгвэл энэ жил шүдлэндээ хэд уралдав?
-Энэ жил шүдлэндээ Ховд аймагт болсон Галдан бошигт хааны мэндэлсний 375 жилийн ой баруун бүсийн наадамд есөөр давхиад сумынхаа 90 жилийн ойд түрүүллээ. Хар үрээ маань Тод манлай уяач Ганбаатарын Зандан хүрэн азарганы дүү халтар азарганы төл. Би авга талаар Тод манлайтай ах дүүсийн хамааралтай. Тэгээд надад халтар азаргыг хязааланд нь бэлэглэсэн юм.
-Халтар азаргаа уясан уу?
-Уясаан. Надад ирээд их, бага наадамд хоёр, гурав түрүүлж, найм айрагдсан. 90 жилээр түрүүлдэг хар үрээний ах нь сумынхаа ойд хараахан айрагдаж чадсангүй.Аймгийн наадамд наймаар, Ховдын даншигт 23-аар  давхисан юм.
-Хар үрээ түрүүлсэн, харин бусад насны морьд яаж давхисан бэ?
-Манай найз Мөнхдэлгэрийн шарга азарга аман хүзүүдсэн. Над дээр уягдсан юм. Мөн их насны хээр морь долоогоор, хар хязаалан зургаагаар давхилаа. Ер нь зургаан насны морь уясан дааганаас бусад нь арав дотор давхисан. Ховдод болсон баруун бүсэд манай сумаас явсан уяачдаас Галбаатарын хар азарга  тавалж, миний хээр морь долоо, хар шүдлэн есөөр ирсэн. Энэ жилийн хувьд иймэрхүү амжилттай л наадлаа.

Б.Долзодмаа