Уяач Б.Баянбаатар: Аавынхаа адууг чанаржуулж, хурдыг нь сайжруулахаар хичээж л байна

-Уугуул нутгийнхаа ойд хязаалан түрүүлгэсэн танд баяр хүргэе?
-Баярлалаа. “Тод магнай” сэтгүүлээрээ дамжуулан нутгийн зон олондоо энэ өдрийн мэндийг дэвшүүлье. Миний аав Батаа гэж олон  алаг адуутай. Сум орон нутгийнхаа наадамд олон жил амжилттай сайхан наадсан буурал байсан. Энэ нутгийнхан андахгүй дээ. Дүү бид хоёр аавынхаа үйл хэргийг үргэлжлүүлж морь уядаг. Сумын маань түүхт 90 жилийн ойд миний хээр хязаалан түрүүлсэнд баяртай байгаа.
-Хурдан хүлгийнхээ удам угшлыг танилцуулах нь зүйтэй байх?
-Миний хээр үрээг “Монгол хээр” гэдэг юм. Эцэг нь Говь-Алтай аймгийн Халиун сумын гаралтай адуу. Харин эх нь Сүхбаатар аймгийн Асгат адуу. Надад ирээд гурван жил болж байгаа юм байна. Даага, шүдлэндээ уралдаагүй. Энэ жил анх уягдаад Төв аймгийн Аргалантын наадамд түрүүлж, Ховд аймагт болсон баруун бүсийн уралдаанд 13-аар давхиад, тэндээсээ Баян-Уул сумандаа  ирж түрүүллээ.
-Сумынхаа 90 жилийн ойд хэдэн насны  морьтой ирсэн бэ?
-Ганц хязаалан үрээтэй ирээд түүнийг түрүүлгэсэн. Миний адуу мал Сүхбаатар аймагт байдаг. Нутгийнхаа ойд Монгол хээртэйгээ зорьж ирж наадаад сайхан түрүүлгэлээ.
-Сүхбаатар аймагт нутаглаж байгаа хүн дээдсийнхээ адууг зүүн зүгийн адуугаар сэлбэн сайжруулж байгаа байлгүй?
-Тиймээ. Зүүн талын адуу цөөнгүй авч байгаа. Аавынхаа адууг чанаржуулж, хурдыг нь сайжруулахаар хичээж л байна.
-Амжилт хүсье. Ярилцсанд баярлалаа.

У.Энхмаа