Аймгийн Алдарт уяач М.Галбаатар: Хар азарга маань энэ жил аргагүй хурдан байгаа

-Баян-Уул сумынхаа 90 жилийн ойн баяр наадамд хар азаргаа түрүүлгэсэн танд баяр хүргэе.
-Баярлалаа. Сумын 90 жилийн ойн баяр наадмын хурдан азарганы уралдаанд  хар азарга маань түрүүлж, нутгийн олноо баясгасан.
-Сумынхаа 90 жилийн ойд хэдэн насны морь уясан бэ?
-Сумынхаа 90 жилийн ойд азарга, соёолон, даага гэсэн гурван насны морь мордуулж, хар азаргаа түрүүлгэн, хар  соёолон аман хүзүүдүүлж, нөгөө хоёрыг хорь гаргаж давхиулсан.
-Мөн баруун бүсийн наадамд хар азарга айргийн тавд хурдалсан шүү дээ?
-Тэгсээн. Баруун бүсийн наадамд манай аймгаас 30-аад морь ирсэн. Одоогийн байдлаар манайхан хэд хэдэн айраг, түрүү аваад байна.
-Хар азарганыхаа удам угшил, өмнө нь гаргаж байсан амжилтыг танилцуулаач?
-Миний хар азарга Төв аймгийн Заамар сумын уугуул Жамъянжав гэж хүний унаган адуу. Хязаалан үрээ надад ирж Зост хайрханы баярт түрүүлэн амжилтын гараагаа эхэлж байлаа. Түүнээс хойш аймгийн наадамд гурван жил дараалан айрагдаад байгаа. Мөн аймгийн чанартай бүсийн наадамд гурван жил дараалан айрагдаад байгаа сайхан буян байгаа юм.
-Харин Засгийн газрын тогтоолт бүсийн наадамд түрүүлж, айрагдаж байсан уу?
-Үгүй ээ, анхных нь энэ наадам болж байна.
-Амжилт хүсье. Ярилцсанд баярлалаа.
Б.Долзодмаа