ХААХҮЯ-ны дэд сайд Ц.Туваан: 10 гаруй жилийн дараа төрийн наадмын анхны айргаа амслаа

-Төрийн баяр наадамд шүдлэн үрээ айрагдуулсанд баяр хүргэе?
-Баярлалаа. “Тод магнай” сэтгүүлээрээ дамжуулаад Монголынхоо нийт ард түмэнд мэндчилгээ дэвшүүлье. Энэ жил дэлхий дэлэгнэж нар хур тэгширсэн сайхан зун болж. Хаа газрын морьд иртэй хурдан байна. Халхын тэрхүү олон хүлэг дундаас миний хул үрээ гуравт давхиж, өндөр довтой төрийн наадмын анхны айргийг амсууллаа. Сэтгэл маш их өндөр байна.
-Хэдэн жилийн хөдөлмөрийн үр шимээр төрийн наадмын анхны хишгийг хүртсэн бэ?
-Арав орчим жилийн хөдөлмөр юм даа. Би Төв аймгийн Баянжаргалан сумын хүн. Манай сум эртнээсээ нааш хурдтай. Би багадаа хурдан морь унадаг байгаад моринд томдоод туслах уяач хүртэл хийж явсан. Түүнийхээ үр шимийг амсч байна.
-Төрийн наадмын анхны айргийг амсуулсан хул үрээнийхээ талаар танилцуулаач?
-Хул үрээ маань Дорнод аймгийн Цагаан-Овоо сумын уугуул, аймгийн Алдарт уяач Түвдэнжаажидын Батзоригийн адуу. Энэ жил хээр хязаалангаа түрүүлгэсэн шүү дээ.
-Хул үрээ өмнө нь яаж давхиж байсан адуу вэ?
-Даагандаа Цагаан-Овоо сумын баяр наадамд айрагдаж байсан гэдэг юм. Над дээр өнгөрсөн хавар ирээд Архуст сумын 55 жилийн ойд түрүүлчихээд улсынхаа баярт ирсэн. Хул үрээний маань уяа сойлгыг аймгийн Алдарт Золзаяа гэж залуу тааруулдаг. Өнөө жил төрийнхөө наадамд сумандаа түрүүлсэн даага, шүдлэнгээ авчраад бусдыг нь Төв аймгийн Эрдэнэ сумын 90 жилийн ойд уралдуулсан.
-Тойргийнхоо сумдын баяр наадамд Туваан сайд одтой наадаж байгаа дуулддаг?
-Энэ жил ойролцоох зургаан сумынхаа баяр наадам, уралдаанаас олон түрүү, айраг хүртсэн. Тэгээд түүндээ урамшаад улсынхаа наадамд уралдъя хэмээн зорьсон нь энэ юм. Үүнээс өмнө улсад мордуулаад 20-30-ын хооронд л давхиулдаг байсан.
-Магнай тэнийлгэсэн баярт наадмууд олон байх болтугай.
-Баярлалаа.
"Тод магнай" сэтгүүл №56