Туулайн хийморь төрийн хишиг

Их Монгол Улс байгуулагдсаны 808 жилийн ой үндэсний их баяр наадмын хурдан хязаалангийн уралдаанд туулай жилтнүүд илүүрхэж наадацгаасан нь бас л сонин. Тод халзан үрээгээ аман хүзүүнд хурдлуулсан Өмнөговь аймгийн Хүрмэн сумын уугуул Ш.Баянбат, Салхин сарт үрээгээ айргийн дөрөвт хурдлуулсан Төв аймгийн Баянцагаан сумын уугуул Д.Баянбат нарын амидаагууд болон хээр үрээгээ айргийн тавд хурдлуулсан Сүхбаатар аймгийн Дарьганга сумын уугуул Г.Эрдэнэбилэг нар 1975 оны туулай жилтнүүд. Нэг жилийн “унаганууд” гурвуулаа аймгийн Алдарт уяач цолтой бөгөөд Ш.Баянбат, Г.Эрдэнэбилэг нар нь төрийн наадмын анхны хишгээ хүртсэн  бол Д.Баянбат азарга түрүүлгэн шинэ амжилтын эзэд болсон билээ. Ийнхүү туулай жилтнүүдийн хийморь ассан хязаалангийн уралдаанаас хишиг хүртсэн Г.Эрдэнэбилэгийн хээр үрээ нь Тод манлай уяач Д.Ононгийн унаган адуу. Бүр тодруулбал айргийн гуравт хурдалсан О.Батбилэгийн Янзага зээрдтэй нэг эцгийн төлүүд. Өмнө нь уягдаж байгаагүй битүү үрээ Тод манлайгаас бэлгэнд авч, төрийн наадамд айрагдуулсан Г.Эрдэнэбилэг Алдарт удам дамжсан уяачдын нэг билээ.
"Тод магнай" сэтгүүл №56