Янзага зээрд

Хурдан хүлэг өөрт нь сэтгэл зүрхээ зориулсан хэн нэгний ачийг хариулж, магнайг тэнийлгэдэг буянт мал. Нэгэн насны амьдралаа аргамаг хүлэгтэй холбож адуутай нөхөрлөсөн Төв аймгийн Сэргэлэн сумын уугуул Тод манлай уяач, гавьяат малчин Дамбадаржаагийн Онон өнөө жил хөдөлмөрийнхөө үр шимийг ханатал амсан бахтай сайхан наадлаа. Аав хүү гурвын уясан найман хүлэг төрийнхөө их баяр цэнгэлд айрагдаж түмэн олноо цэнгүүлсэн бөгөөд түүний нэг нь Янзага зээрд үрээ  юм.
О.Батбилэгийн уяж хурдлуулсан зээрд үрээ хоёр талаас тойруулга цустай адуу. Эцэг Шонхор азарга нь тойруулгын хурдан хүлгүүдийн нэг Сарт хүрэн азарганы төл бол эх нь эх нь тойруулга угшилтай Туулын хээр /Сохор ухаагийн төл/ гүүний төл зээрд гүү.
Даагандаа уягдалгүй өнжсөн зээрд үрээ шүдлэндээ Төв аймгийн 90 жилийн ой, төвийн бүсийн уралдаанд айргийн гуравт хурдалж, томоохон наадмын өм нээсэн агаад өнөө жил төрийнхөө наадамд айрагдаж, давхар уяагаар зүүн бүсийн уралдаанд айргийн дөрөвт давхисан билээ.
"Тод магнай" сэтгүүл №56