Ц.Мөнхбат: Зээрд азарга сумынхаа баярт нэг түрүүлж, нэг айрагдаад байна

Эрдэнэцагаан сумын 90 жилийн ойн баяр наадамд зээрд азаргаа түрүүлгэсэн залуу уяач Цэрэнжавын Мөнхбатаас баярын сэтгэгдэл хуваалцсанаа хүргэе.
-Сумынхаа 90 жилийн ойн баяр наадамд адуун сүргийн манлай азарга түрүүлгэсэн танд баяр хүргэе?
-Баярлалаа. Зээрд азарга маань манай ах аймгийн Алдар  уяач Амарбат гэж хүний адууны угшилтай.Би хавчигаас нь хойш уяж байгаа юм. Энэ жил наймтай азарга. Анхны уясан жилээ сумынхаа наадамд арван хэдээр давхиулсан. Харин ноднин таваар давхиулж айрагдуулаад, өнөө жил 90 жилийнхээ ойд хол сайхан түрүүлгэлээ. Баяртай байна.
-Бэлгэнд ирсэн адуу юу?
-Тиймээ. 2008 онд манай ээж улсын сайн малчин болоход Амарбат ах шагналыг нь мялааж өгсөн юм. Ахын маань сэтгэлээсээ өгсөн бэлэг дээ.
-90 жилийн ойн баяр наадамд хэдэн насны морь мордуулав. Азарганаас бусад нь яаж давхисан бэ?
-Азарга, шүдлэн хоёр мордуулсан. Азарга нь түрүүлж, шүдлэн нь  20 гаргаж давхилаа.
-90 жилийн ойн баяр наадмын талаарх сэтгэгдлээсээ хуваалцаач?
-Өмнөх ойн баяр наадмуудаасаа илүү өргөн дэлгэр болж байна. Зохион байгуулалт сайтай, уралдаанууд ч өтгөн. Түүнийгээ дагаад наадамчин олон ч  сэтгэл хангалуун байх шиг санагдсан. Ер нь товчхондоо морьд нь хурдан, бөхчүүд нь хүчтэй, харваачид онч мэргэн байлаа.
-Түрүү азарганы эзэн хурдан хүлгийн уяа тааруулах болсоор удаж байна уу?
-Багадаа ах нарынхаа уясан морийг унадаг байгаад сүүлдээ өөрөө морь уядаг болсон. Харьцангуй залуу уяач даа. Олон ч морь уядаггүй. Гурав дөрвөн морь бариад давхил орсон ганц нэгийг нь мордуулдаг юм. Зээрд азарганаас гадна халтар морьтой. Энэ хавийн бага шиг наадмуудад айрагдаж байсан. Би хоёр хүүтэй. Хүү маань зээрд азаргаа унаж хурдлуулдаг юм.
-Аав хүү хоёрын дараа дараагийн наадмуудад амжилт хүсье.
-Баярлалаа.
Б.Долзодмаа