Булганы Булган-Эрдэнийн Түмэндэмбэрэл түрүүллээ

Сумын цолтон болон залуу бөхчүүдийн энэ сарын ээлжит барилдаан сайхан боллоо. Барилдаанд сумын цолтой 300 гаруй, залуу бөх 200 орчим нийт 512 бөх зодоглон барилдав.
Бөхийн барилдааны нэгийн даваанд Бөх Билэгт дэвжээний бөх шилдэг сумын заан Б.Чинбат Налайхын М.Хажимуханд шороодсон бол Жүдо бөхийн ОУХМ, сумын заан Д.Төмөрхүлэг, МУИС-ийн Ш.Базарсад, “Хөдөлгөөнт бай” фитнессийн Ч.Батхүү нар учраагаа босоо өмсөн давж үзэгчдийг шуугиуллаа. Мөн Хантайширын Х.Элдэв-Очирын дүүгүүрдсэн, Их Богдын Д.Бат-Эрдэнийн давхар хамж цацсан барилдаанууд үзүүштэй байв. Аварга сургуульд бэлтгэлээ базааж буй Дорнодын Б.Лхагвасүрэн Булганы Г.Цэдэн-Ишийг дагуулж мушгиад, Хэнтийн Ц.Өнөболд Говь-Алтайн Я.Бумбаярыг мушгиж тонгороод нэг давцгаав.
Хоёрын даваанд ИМХ-ий Б.Цэрэндагва ОБЕГ-ын Б.Бат-Эрдэнийг халбагадаж цацаад, Хэнтийн С.Тэмүүлин Их Богдын Ш.Мөнх-Очирыг нааж хавираад, МУИС-ийн Ш.Базарсад “Хилчин” дэвжээний Д.Пүрэвдоржийг өмсөөд, Бөх Билэгтийн Б.Батсайхан ИМХ-ий Б.Цэдэнсодномыг дагуулж хөмрөөд давлаа. Энэ даваанд шилдэг заануудаас Таван ханы Х.Жанболат Их Богд дэвжээний Ц.Цэндэд өвдөг шороодов.
Гурвын даваанд Хөвсгөлийн Га.Бат-Эрдэнэ Хэнтийн С.Тэмүүлинг хонгодож цацаад, “Хилчин”-ий М.Ууганбаатар Увсын П.Цэвэгжавыг хавсрахад үлдээд, ИМХ-ий Н.Загархорол Говь-Алтайн Л.Өлзийбатыг татаж хавираад, Төвийн П.Эрхэмжаргал Хөвсгөлийн Ц.Батцоожийг хөлд давхар гүйгээд, Булганы Э.Нямбаяр Бөх Билэгтийн С.Цогтбаатарыг мушгиж тонгороод, Зэвсэгт хүчний 17 дугаар ангийн М.Амарсанаа төвийн И.Отгондоржийг татаж мордоод, Ховдын О.Пүрэвбаяр Завханы Д.Дэмиддоржийг гар уургалж мушгиад, Бөх Билэгтийн Н.Нямдорж Булганы Э.Сумьяабатыг давхар ачаад, Завханы Т.Дүгэрдорж Түшээт ханы С.Лундааг өшиглөөд тус тус гурав давлаа. Мөн энэ даваанд Өвөрхангай аймгийн Нарийнтээл сумын харьяат, жүдо бөхийн ОУХМ, саяхан болсон Азийн наадмын аварга Д.Төмөрхүлэг үзэгчдийг шуугиулсан барилдаан гаргасаар Завханы Р.Цамбагаравыг нааж хавираад давлаа.
Дөрвийн нугалаанд Таванхан дэвжээний Н.Ширчинхүү “Аварга” сургуулийн М.Баасандоржийг дунгуйлдаж татаад, “Соёмбо” спорт хорооны Э.Даваажаргал Бөх Билэгт дэвжээний Т.Мөнхбатыг мушгиад, Увсын Э.Гансүх Таванханы Н.Батмөнхийг дагаж тахимдаад, Таванханы С.Оргилбаатар Бөх Билэгтийн М.Данзанжамцыг баруун хавсраад, “Женко”-ийн Д.Урианхай Завханы Д.Батхүрэлийг дэгээ ороож эргээд, Бөх Билэгтийн Н.Мөнх-Эрдэнэ Ховдын Н.Амарсайханыг давхар хамж цацаад, Бөх Билэгтийн С.Түвшинжаргал ИМХ-ий З.Баттөмөрийг давхар тохоод давснаар шөвгийн даваанд барилдах эрхтэй боллоо.
Тавын даваанд Дундговийн Т.Дагвацэрэн ИМХ-ий Б.Цэрэндагвыг тахимдаж дайраад, ИМХ-ий Н.Даваадорж Бөх Билэгтийн С.Түвшинжаргалыг суйлаад, Бөх Билэгтийн Н.Мөнх-Эрдэнэ Таванханы С.Оргилбаатарыг давхар хамаад, Таванханы Н.Ширчинхүү Увсын Б.Буяндэлгэрийг хавсраад, “Аварга” дээд сургуулийн Г.Батмөнх Завханы Д.Хандсүрэнг хонгодоод түрэхэд дагуулж гуядаад, Булганы Б.Түмэндэмбэрэл Бөх Билэгтийн С.Майнбаярыг шуудагдаж түрэнгүүт буцааж зайлаад, “Соёмбо”-ын Э.Даваажаргал Бөх Билэгтийн Н.Нямдоржийг мушгиад, Говь-Алтайн Г.Ганхуяг Увсын Б.Алтангэрэлийг зүүн мордоод, Ховдын Б.Батбаяр ИМХ-ий Г.Цэнддоржийг сөрж тахимдаад, Төвийн П.Эрхэмжаргал “Женко”-ийн Д.Урианхайг солгой тонгороод давж шөвгөрөв.
Зургаагийн даваанд ИМХ-ий Х.Энхчулуун Хантайширын Г.Ганхуягийг суйлж түлхээд, Таванханы Н.Ширчинхүү Завханы Г.Анхбаярыг мордоход сөрж хутгаад, “Аварга”-ын Г.Батмөнх Ховдын Б.Батбаярыг зүүн талдаа мордоод, ИМХ-ий Н.Даваадорж Дундговийн Т.Дагвацэрэнг хонгодоод, Бөх Билэгтийн Н.Мөнх-Эрдэнэ Төвийн П.Эрхэмжаргалын баруун хөлийг аваад, Увсын Э.Гансүх “Шонхор”-ын М.Улаанхүүг хашиж мордоод тус тус давлаа.
Долоогийн даваанд ИМХ-ий Х.Энхчулуун Говь-Алтайн Г.Батмөнхийг шахаж татангуут угсруулж мордоод, Таванханы Н.Ширчинхүү ИМХ-ий О.Наранбаатарыг зүүн мордоод, Булганы Б.Түмэндэмбэрэл Бөх Билэгтийн Н.Мөнх-Эрдэнийг баруун сугадаж хөндий мушгиад, Увсын Э.Гансүх ИМХ-ий Н.Даваадоржийг баруун талдаа хавираад тус тус давж их шөвөгт шалгарав.
Шөвөгт манлай заан Х.Энхчулуун Увсын Э.Гансүхийг амлаж төвөггүй давсан бол тунасан хоёрын барилдаан сайхан болж Н.Ширчинхүүг өхийлдөөд дутуудангуут Б.Түмэндэмбэрэл баруун талдаа мушгиж тонгороод давснаар үзүүрт шалгарлаа.
Түрүү үзүүрт баруун талдаа халз хутган давснаар Булган аймгийн Орхон сумын харьяат, Булган-Эрдэнийн Түмэндэмбэрэл түрүү бөхөөр тодорч үзэгч дэмжигчдийнхээ магнайг тэнийлгэв. Хэвэлхүүгийн Энхчулуун хэр баргийн бөхөд унахгүй болсноо харуулж үзүүр булаалаа.
Т.Түмэндэмбэрэл