Аймгийн Алдарт уяач М.Ганболд: Алаг үрээний амжилт улс, бүсийн наадмын хоёр дахь хишиг болж байна

Ховд аймагт болсон баруун бүсийн наадмын үеэр эрлийз дунд насны ангилалд алаг үрээгээ түрүүлгэсэн Говь-Алтай аймгийн Баян-Уул сумын уугуул, аймгийн Алдарт уяач Мижидийн Ганболдоос баяр наадмын талаарх сэтгэгдлийг нь хуваалцсанаа хүргэж байна. 
-Баруун бүсийн уралдааны эрлийз дунд насны ангилалд алаг үрээгээ түрүүлгэсэн танд баяр хүргэе?
-За баярлалаа. Баруун бүсийн уралдаанд нас болгоны адуутай ирж, азарга еслөн, хязаалан долоолж, эрлийз дунд насны ангилалд алаг үрээ маань түрүүллээ. Бусад нь арав гаргаж давхисаан.
-Алтайчуудын наадам болж байна гээд хэлчихвэл нэг их хол зөрөхгүй байх?
-Санал нэг байна. Ховд нутагт зохион байгуулагдаж буй энэхүү уралдаанд баруун таван аймгийн уяачид оролцож, манай Алтайчууд илүү давамгай сайхан наадаж байна. Би Говь-Алтай аймгийн Баян-Уул сумын  хүн. Өнөө жил манай сумын 90 жилийн ой тохиож байгаа эндээс очоод сумынхаа ойд морьдоо уралдуулна даа.
-Улсын наадамд соёолон үрээ айрагдуулж байсан. Морь уяснаас хойш улс, бүсийн наадмаас хичнээн айраг, түрүү хүртээд байгаа вэ?
-Би 2007 оноос хойш морь уяж байгаа. Энэ жил аймгийн Алдарт уяач цолоо авсан. Үүнээс өмнө 2011 оны улсын баяр наадамд соёолон айргийн гурваар давхиулж байсан. Алаг үрээний амжилт улс бүсийн наадмын хоёр дахь хишиг болж байна. 
-Энэ жил улсын наадамд оролцсон уу?
-Оролцсоон. Энд долоолдог үрээ маань улсад 20 хэдээр давхисан.
-Уралдааны зохион байгуулалтын талаарх санал бодлоосоо хуваалцаач?
-Эрлийз монголоо ялгахдаа шударгаар хандмаар байна. Яг эрлийз адууг нь хасахгүй мөртлөө монгол морь хасчих юм. Дээрээс нь морь гарааны газар нь нас болгон дээр өөрчлөгдөөд хүн хүч муутай хүмүүс бол морио хоцроогоод уралдуулж чадахааргүй байна. Тэгээд газар мэдэхгүй гадны бид чинь хаанаас ямар насны морь гарахыг сайн мэдэхгүй байна шүү дээ. Ядахдаа их морь эндээс гарна, соёолон эндээс гарна ч гэдэг юм уу, пайз тавих хэрэгтэй байж. Цаашдаа энэ тал дээрээ анхаарах байлгүй.

А.Тэлмэн