Ж.Бат-Эрдэнэ: Морь уях асуудлыг нийтийн хэмжээнд өргөжүүлэх зорилт тавьж байгаа

Монгол адуугаа дэлхийн дээд амжилтанд бүртгүүлсний нэг жилийн ойд зориулсан уяачдын баярын өдөрлөгийн үеэр Булган аймгийн “Булганхангай” МСУХ-ны тэргүүн Ж.Бат-Эрдэнээс цөөн асуултанд хариулт авснаа хүргэж байна.
-Морьтон монголчууд дэлхийн дээд амжилт тогтооход Булганчууд үнэмлэхүй хувь нэмэр оруулсан. Нийт хичнээн хүний бүрэлдэхүүнтэй ирж байсан бэ?
-Монгол адууг дэлхийн дээд амжилтанд бүртгүүлэх түүхэн үйл ажиллагаанд манай аймгаас 600 гаруй морь уралдаж, 700 гаруй морьтон жагссан. Энэ жилээс дэлхийн дээд амжилтанд бүртгүүлсэн баяраа тэмдэглэж байхаар болж байна. ММСУХ-ны тэргүүлэгчдийн энэхүү шийдвэрийг манайхан талархалтай хүлээн авч дөрвөн машинтай арваад хүн ирлээ. Бид бүхний ирсэн зорилго бол зөвхөн баярт оролцох бус, хамгийн гол нь уламжлал ёс заншлаа дээдлэн, уяачдаа хөгжүүлэх, ёс зүйг нь дээшлүүлэхэд чиглэж байгаа юм.
-Энэ жил Булган аймгийн нэлээд хэдэн сум ойтой байсан. Ойн баяр наадмууд дэлгэр болов уу?
-Энэ жил манай аймгийн таван сум үүсч хөгжсөнийхөө түүхт ойгоо тэмдэглэн өнгөрүүлсэн. Тэдгээрийн дөрөв нь 90, нэг нь 30 жилийн ойгоо тэмдэглэлээ. Ойн баяр наадмуудад уяачид маань өргөн бүрэлдэхүүнтэйгээр оролцож, нутгийн олноо хөгжөөж байна лээ. Ойтой сумдаар явсан хүмүүстэй ярилцаад сууж байхад “морь уралдуулна гэдэг баячуудын тоглоом гэсэн нь үгүй юм байна” гэдгийг ойлгож мэдэрсэн байсан. Тэр ч бүү хэл “нэгэн үе алдагдсан өв соёлыг хөгжүүлье гэсэн үүднээс морь уяж байгаа юм байна шүү” гэдгийг мэдэрснээ ярьж байсан. Энэ хамгийн чухал юм. Сүүлийн үед бид ярьж байгаа шүү дээ. “Морь унадаг хүн байхгүй боллоо. Мотоцикльтой монгол боллоо” гээд. Энэ бол бидний амьдарч буй нийгмийн цаг үеэ дагасан өөрчлөлт. Үүний эсрэг уяачид, хурдан морины зүтгэлтнүүд л тэмцэж байна гэдгийг хүмүүс ойлгож байгаад баяртай байна.
-2014 онд “Булганхангай” МСУХ-ны ээлжит бага хурал хуралдаж, тэргүүнээр улиран сонгогдсон. Ирэх дөрвөн жилд ямар ажлууд төлөвлөж байгаа вэ?
-Хамгийн түрүүнд уяадынхаа холбоог илүүтэй бэхжүүлье гэж зорьж байгаа. Уяачдынхаа оролцоог өргөжүүлж, цаашлаад адууныхаа угшлыг сайжруулъя гэсэн зорилт тавиад байгаа. Ер нь морь уях асуудлыг нийтийн хэмжээнд өргөжүүлэх зорилт тавьж байгаа. Дээрээс нь түрүүн миний ярьсан уяачдын холбоогоо өргөжүүлэх тал дээр анхаарал хандуулж, тодорхой хүмүүсийг байнгын ажлын байраар хангаж, үйл ажиллагааг нь тогтмолжуулъя хэмээн зорьж байна.
-Морин жилийн уралдаанууд өндөрлөж байна. Булганчууд хэрхэн наадсан бол?
-Улсын баяр наадмын соёолонгийн уралдаанд миний ногоон үрээ айрагдсан. "Хотгойдын хурд" хангайн бүсийн уралдаанд Хишигжаргал Манлай маань одтой сайхан наадан нэг түрүү, нэг айраг хүртсэн. Одоогоор дүн мэдээ нэгтгэгдээгүй байгаа учраас нэг бүрчлэн хэлэх боломжгүй байна. Ямар ч байсан Булган нутгийн уяачид маань морин жилийн уралдаануудадаа амжилттай сайхан наадсан.
-Ярилцсанд баярлалаа. Амжилт хүсье.
А.Тэлмэн