Т.Доржбат: Манай Баянхонгорт уурга нэлээд сайн хөгжсөн

25 дахь удаагийн уран уургач, бугуйлч, эмнэг хангал булгиулалтын УАШТ тэмцээний уургын төрөлд 24 тамирчин оролцсноос Баянхонгор аймгаас ирсэн залуу тамирчин Т.Доржбат хоёрдугаар байр эзлэн мөнгөн медаль хүртсэн билээ.
-Хонгор нутгийн нэрийг өргөн мөнгөн медаль хүртсэн танд баяр хүргэе?
-Баярлалаа. Уран уургач, бугуйлчийн УАШТ-нд гурав дахь жилдээ оролцож байна. Энэ жил анх удаа уургын төрөлд орж хоёрдугаар байр эзэллээ. Үүнээс өмнө  Хэнтий аймгийн Өмнөдэлгэр сум болон  Ховд аймагт зохиогдсон УАШТ-ний эмнэг хангал булгиулалтын төрөлд хоёр удаа орж байсан. Энэ удаагийн тэмцээн үндэсний спортын V их наадам гэдэг утгаараа нэлээд өргөн дэлгэр болж байна.
-Баянхонгор аймгаас хичнээн тамирчин ирсэн бэ. Ямар, ямар төрөлд өрсөлдөв?
-Гурван тамирчин ирж, эмнэг хангал булгиулалт, бугуйл, уран уурга гэсэн төрлүүдэд өрсөлдлөө.
-Хэзээнээс тэмцээнд орох болсон бэ?
-Адуу малын захад өсч, багаасаа  хичээллэж эхэлсэн дээ. Хоёр удаа аймгийн аваргаар шалгарсан. Манай Баянхонгорт уурга нэлээд сайн хөгжсөн. Бугуйлаасаа илүү уургаа түлхүү хэрэглэдэг.
-Ерөнхий сайдын нэрэмжит тэмцээнд оролцсон уу?
-Оролцоогүй ээ. Ирэх жилийнхэд оролцох бодолтой байгаа.
-Амжилт хүсье.
У.Энхмаа