Н.Даваадорж: УАШТ-нээс гурван төрлөөр медаль хүртээд байна

Монгол ахуй соёлын салшгүй нэг хэсэг болсон морь унаж ,эдлэх үйлийг хөхүлэн дэмждэг уран уургач, бугуйлч, эмнэг хангал булгиулалтын УАШТ амжилттай болж өндөрлөсөн. Хүйн долоон худагт болсон 25 дахь удаагийн УАШТ-ний уургын төрөлд тэргүүлсэн Булган нутгийн хүүтэй цөөн хором ярилцлаа.   
-Улсын аварга уран уургачид баяр хүргэе?
-Баярлалаа. Би гурав дахь удаагаа уран уургач, бугуйлч, эмнэг булгиулалтын УАШТ-нд оролцож байна. Өнгөрсөн жил Булган аймагтаа болоход нь бугуйлын төрөлд оролцоод гуравдугаар байр эзэлж байсан. Түүний өмнө 2003 онд Төв аймгийн Алтанбулаг суманд болсон УАШТ-ний эмнэг сургалтын төрөлд оролцож гуравдугаар байр эзэлж байсан.
-Аргагүй адуу янцгааж, айраг шуугисан нутгийн хүү гэдгээ удаа дараа баталж байгаа юм байна?
-Тийм шүү. Миний нутаг жинхэнэ адуу, айргийн орон. Нутгийнхаа нэрийг гаргаж өнөөдөр алтан медаль авсандаа баяртай байна.
-Спортын цол зэрэгтэй юу?
-Хараахан үгүй ээ. Одоо л болох байх гэж найдаж байна.
-Ерөнхий сайдын нэрэмжит цомын тэмцээнд оролцож байсан уу?
-Ирж амжаагүй ээ. Манай Булганаас өөр тамирчид явсан. Улсын аварга шалгаруулах тэмцээнд аймагтаа түрүүлсэн шигшээ тамирчид явдаг. Тэр жишгээр би аймагтаа түрүүлээд, улсын аваргад ирсэн.
-Энэхүү тэмцээнийг морь унаж эдлэх соёлыг дэлгэрүүлэхэд ихээхэн ач холбогдолтой хэмээдэг. Та санал нэгдэх үү?
-Нэгдэнэ. Хаа сайгүй морь унахаа байж, мотоцикль хэрэглэдэг болсон шүү дээ. Найр наадам дээр ч ялгаагүй морьтой хүн ховор болсон. Морио унаж монголоороо наадахад энэ тэмцээн ач тустай. Энэ жил залуучууд олноор ирсэн байна гэж байсан. Тэгэхээр залуучууд маань бас  мориноосоо тэгтлээ хөндийрөөгүй байгаа юм болов гэж бодож байна.
-Сумын Алдарт уяач цолтой юмаа даа?
-Тиймээ. Монгол хүн юм чинь морио уяна, унана. Аймгийн Алдарт уяач цол руу зүтгэж явна даа.
-Амжилт хүсье.
У.Энхмаа