Д.Отгонбат: Манай уяачид улс, бүсийн наадмаас нэг түрүү, гурван айраг авлаа

Есдүгээр сарын 5-ны өдөр зохион байгуулагдсан уяачдын өдөрлөгийн үеэр Архангай аймгийн МСУХ-ны нарийн бичгийн дарга Д.Отгонбаттай уулзаж ярилцсанаа хүргэж байна. 
-Уяачдын өдрийн мэнд хүргэе?
-Баярлалаа. Одоогоос нэг жилийн өмнө Архангайчууд бид дэлхийн дээд амжилтыг тогтоох түүхэн үйл явдалд оролцоно хэмээн хөл хөөрцөг болж байсан. Ний нуугүй хэлэхэд тэр олон мянган морь уралдах нь нэг талаараа бахтай сайхан ч нөгөө талаараа унаач хүүхдийнхээ аюулгүй байдалд санаа зовон түгшиж байсан. Олон хүний хичээл зүтгэлээр хүүхэд морь мэнд сайхан наадаж, түүхэн уралдаан амжилттай болсон. Архангайчууд тэрхүү түүхэн үйл явдалд 18 сумын төлөөлөл 300 гаруй морьтой ирж хангайн бүсдээ Отгонбаатарын хар морь түрүүлж, Алаг-Уулын Даншиг хар аман хүзүүдсэн шүү дээ. Тэрхүү хурдан хүлгэдийн булган сүүл ивээж өнөөдөр Архангай аймгийн Төвшрүүлэх сумын уугуул, аймгийн Алдарт уяач Ө.Пүрэвбаатар ахын маань даага түрүүлчихээд бид бас л бөөн баяр баясгалан болоод сууж байна.
-Өнөөдрийн /2014.09.05/арга хэмжээнд Архангайчууд ямар бүрэлдэхүүнтэй ирэв?
-Манай холбоо 32 тэргүүлэгчтэй. Түүнээс 20 гаруй нь өнөөдөр хүрэлцэн ирж  “Морьтон Монгол” цогцолборын шав тавихад оролцож, тангаргаа өргөлөө. Анхны юм бүхэн үнэ цэнэтэй байдаг. Хүйн долоон худгийнхаа энэ дэнж дээр анх удаа уяачид тангараг өргөхөд оролцсондоо бид бүгд их баяртай байгаа. Зохиогдсон бүх л тэмцээнүүдэд уяачдаа төлөөлөн оролцож Батцэнгэл сумын харьяат залуу уяач дэмбээний төрөлд гуравдугаар байр эзэллээ.
-Морин жилийн уралдаанууд отголж байна. Энэ жил Архангайчууд хэрхэн наадсан бол?
-Архангайн уяачдын бахархал болсон хоёр жилд нэг удаа болдог ”Арын хангайн шигшмэл хурд-3” уралдаан маань амжилттай зохион байгуулагдлаа. Түүнээс гадна манай уяачид улс, бүсийн наадмаас нэг түрүү, гурван айраг авч нутгийнхаа нэрийг дуурсгалаа. Эдгээр уяачдаа
”Арын хангайн шигшмэл хурд” уралдааныг санаачлан зохион байгуулагч Г.Тэмүүлэн маань урьж, хүндэтгэл үзүүлсэн. Энэ дашрамд нэг зүйлийг онцлон хэлэхэд  шигшмэл хурд уралдааныг хийдэг болсноор манай Архангайн адуу эрс өөр болсон. Уяачдын ур чадвар сайжирч, адуу нь ч чанаржиж улс бүсийн наадамдаа өндөр амжилт үзүүлж байна шүү дээ.
У.Энхмаа