Сумын Алдарт уяач Г.Алтангэрэл: Алаг морь бүсийн наадмын хоёр дахь айргаа авлаа

Ховд аймагт болсон баруун бүсийн уралдаанд Алтайчууд одтой сайхан наадаж, хамгийн олон айраг түрүү хүртсэн. Их насны морьдын уралдааны түрүү ,айргийн морьд цөм Алтай нутгийн хөвгүүдийн хүлгэд байсан бөгөөд бид 
алаг морио айргийн дөрөвт хурдлуулсан Говь-Алтай аймгийн Дарви сумын уугуул, сумын Алдарт уяач Г.Алтангэрэлээс баярын сэтгэгдлийг нь хуваалцсан юм.
-Их морь айрагдуулсанд баяр хүргэе. Өөрийгөө танилцуулахгүй юу?
-Баярлалаа. Намайг Гаравын Алтангэрэл гэдэг. Говь-Алтайн Дарви сумын харьяат, сумын Алдарт уяач цолтой. Алаг морь маань баруун бүсийн даншиг наадамдаа айргийн дөрвөөр давхилаа. Сэтгэл өндөр сайхан байна.
-Баруун бүсийн их насны морьдын уралдаан Алтайчуудынх боллоо.
-Тэглээ. Манай аймгийн таван морь дараагаараа орлоо. Энэ уралдаанд манай сумаас нэлээд хэдэн уяач ирсэн. Нэг шүдлэн дөрвөөр давхиж, нэг соёолон наймаар орлоо. 
-Алаг мориныхоо удам угшлыг танилцуулаач?
-Миний алаг морь Хэнтий аймгийн Баянхутагт сумын адуу. Манай сумын Дөш гэж аймгийн Алдарт уяач авчраад би авсан юм. Надад ирсэн цагаасаа хурдалж байгаа . Энэ жил зургаан настай. Ноднин соёолондоо Завхан аймгийн 90 жилийн ойд аман хүзүүдсэн. Энэ хоёр дахь бүсийн айраг нь байгаа юм.
-Даага, шүдлэн, хязааландаа яаж давхисан юм бэ?
-Даага, шүдлэндээ 7-8-аар л давхиж байгаад хязаалангаасаа эхлээд л харайсан.
-Хавар Говь-Алтай аймгийн шилдэг хүлэг шалгаруулах уралдаан болсон. Түүнд уралдсан уу?
-Тэнд явуулаагүй.
-Баруун бүсийн уралдааны талаарх санаа бодлоосоо хуваалцаач?
-Энэ жилийн баруун бүсийн наадам өргөн дэлгэр сайхан болж байна. Нэг гэм нь шороогоор шуураад байх юм. Хуртай  байсан бол хүүхэд моринд зүдэргээгүй сайхан байх байлаа.
-Алаг морины эзэн хэзээнээс хурдан хүлгийн уяа тааруулж байгаа вэ?
-Харьцангуй сүүл үеийн уяач даа. Морь уядаг болоод дөрвөн жил л болж байна. Өнгөрсөн жил Завханы 90 жилийн ойн баяр наадмын дараа сумын Алдарт уяач цолоо авсан. Одоогийн байдлаар сумын наадмаас 3-4 түрүү аваад байна. Алаг морь маань хязаалан, соёолондоо  сумынхаа наадамд түрүүлсэн. Сая Ховд аймгийн Дарви сумын 90 жилийн ойд уралдаад аман хүзүүдчихээд энд ирсэн. Ноднин соёолондоо Ховд аймгийн Цэцэг суманд болсон аймгийн бүсийн уралдаанд дөрвөөр давхиж, Говь-Алтай аймгийн Дарви суманд болсон Алтайн бүсийн уралдаанд гурваар орсон. Ер нь их сайн давхиж байгаа.
-Сэтгэгдлээсээ хуваалцсанд баярлалаа. Дараа дараагийн уралдаануудад нь амжилт хүсье.
-Баярлалаа.
А.Тэлмэн