Төрийн наадмын анхны хишиг ногоон үрээ

Булган аймгийн Хутаг–Өндөр сумын уугуул Жадамбын Бат-Эрдэнийн ногоон үрээ АХ-ын 93 жилийн ойн баяр наадмын соёолонгийн уралдаанд айргийн гуравт хурдалж, төрийн наадмын анхны айргийг нь амсууллаа. Хурдан хүлгийн хийморьт сүслэх болсоор арав гаруй жилийн нүүр үзэж буй Булган хангайн хүү ийнхүү улс, бүсийн наадмаас дөрвөн айрагтай болж буй юм. Ингээд эрхэм  морь сонирхогч та бүхэндээ ногоон соёолонгийн талаар товч танилцуулъя.
Угшил гарвал: Ногоон үрээ АХ-ын 93 жилийн ойд хязаалан түрүүлгэсэн Дорнод аймгийн Цагаан-Овоо сумын уугуул, аймгийн Алдарт уяач Түвдэнжаажидын Батзоригийн унаган адуу. Унаган хүлгэд нь улс, бүсийн наадамд түрүүлж, айрагдаж буй хийморилог уяачийнд Ерөнхий сайдын хамт айлчлалаар явж байсан БХБЯ-ны Төрийн нарийн бичгийн дарга Ж.Бат-Эрдэнэ  саатаж, бага уралдаанд айрагдсан ногоон даагыг нь авахаар болсон гэдэг.
Амжилтын товчоон:
Даагандаа бага наадамд нэг айрагдсан ногоон үрээ  уягдалгүй өнжсөөр өнөө жил “Хүй мандал” гал уяандаа уягдан ийнхүү төрийнхөө их баяр цэнгэлд айрагдаад буй юм.
"Тод магнай" сэтгүүл №55