Уяач Г.Тэмүүлэн: Унаган адууны гурав дахь үеийн төлүүд гарч байна

-Тоосонд нь ороход бүтэн жилийн хийморь сэргэдэг соёолон түрүүлгээд ихэд догдолж байх шиг харагдсан. Баярынхаа сэтгэгдлээс хуваалцаач? 
-За баярлалаа. Төрийнхөө их баяр цэнгэл, наадамд маань халтар соёолон маань сайхан хурдаллаа. Халтар үрээ маань төрийнхөө их баяр наадамд хоёр дахиа түрүүллээ. Мөн дээр нь бидний хувьд улсынхаа наадамд 14 дэх жилдээ хурдан хүлгүүдээ мордуулж сүүлийн зургаан жил дараалан айраг түрүү хүртэж байна. Үүнийг нутгийн маань уул ус, наадамчин олны маань буян хишиг нь түшлээ гэж бэлгэшээж та бүхэндээ баярлаж байна даа.
-Зургаан жил тасралтгүй төрийн наадмын хишиг хүртэнэ гэхээр адуунууд аргагүй хурдан байна даа?
-Бидний хувьд 15 гаруй жилийн хугацаанд өөрийн адууныхаа үүлдэр угсааг сайжруулах тал дээр ихээхэн анхаарч ирсэн. Үр төлүүд нь ч  гарч сайхан давхиж эхэллээ. Өөрийн унаган адууны 3 дахь үеийн төлүүд ч гараад байна. Хурдан адууныхаа үр төлийг нутгийн олон болон найз нөхөддөө харамгүй өгч байгаа. Тэднээс маань олон сайхан хурд гарч байгаа сураг дуулаад баяртай л байна. Тухайлбал, энэ жилийн Архангай аймгийн азарганы түрүү бол манай унаган адуу. Мөн Орхон аймагт улсад нэг түрүүлж, нэг айрагдсан манай Хамар цагаан азарганы төл шүдлэнд түрүүлсэн гэсэн. Дээр нь 6,7 сумын наадмаас одоогоор 4 түрүү, 10-аад айраг авсан гэсэн баяртай мэдээнүүд найз, нөхөд нутгийн олноос дуулдаж байна.
Үүний зэрэгцээ энэ жилийн улсын баяр наадмын соёолонд аман хүзүүнд давхисан Онон Тод манлайн сартай зээрд үрээ бол манай Хамар цагаан азарганы маань төл байгаа юм. Ийнхүү унаган адуунууд маань сайхан давхиж байгаад бид бүхэн баярлаж сууна.
-Халтар соёолон наадмын өмнөх сунгаануудад яаж давхиж байсан бол?
Энэ жил их сайхан зун болж байна. Хааяагүй зуншлага сайхан гарч хүн бүр ялангуяа уяач бүрийн л сэтгэл тэнэгэр сайхан байна даа. Бидний хувьд 6 сарын 20-д гээд Цагаан хөтөлд ирж буусан, бүх давхилаа энд хийсэн. Наадмын өмнөх сунгаануудад халтар үрээ маань өнгөнд давхиж битүүхэндээ горьдлого төрүүлж байлаа.
-АХ-ын 93 жилийн ойд хэдэн насны морь мордуулж, яаж давхив?
Энэ жилийн хувьд нас насанд хүлэг морьдоо уясан боловч бага, дунд сунгааны өнгийг харж байгаад хоёр соёолон үрээгээ л  төрийн наадамдаа мордууллаа. Нөгөө үрээ маань арав гаргаж давхилаа.
-Дөлгөөн хар энэ жил өнжсөн уу. Дуулдсангүй?
Эрхэт төрийн идэр түмний эх Дөлгөөн хар азаргаа энэ жил өнжөөсөн.
-Г.Тэмүүлэн улс, бүсийн наадмаас хүртсэн амжилтаараа аль эрт цолтны эрэмбэнд жагсах болсон.
-Халтар үрээ маань түрүүлснээр улс, бүсийн 30-аад айраг, үүний дөрөв нь төрийн наадмын түрүү болж байна.
"Тод магнай" сэтгүүл №55