Аз хийморийн бэлгэдэл соёолон

Од хийморийн бэлгэдэл соёолон насны морьдын уралдаан жилийн жилд хамгийн олон үзэгчтэй байдаг. Өнөө жил ч гэсэн үзэгч олон хийморийн адис авахаар Хүйн  долоон худгийн торгон ногоон дэнжнээ хуран чуулсан байсан. Соёолонгийн уралдаанд Монгол орны дөрвөн зүг найман зовхисын 258 хурдан хүлэг бүртгүүлснээс 218 нь гарааны зурхайгаас эргэсэн байна.
Төрт ёсны 2223 жил, Их Монгол улс байгуулагдсаны 808, АХ-ын 93 жилийн ой үндэсний их баяр наадмын хурдан соёолонгийн уралдаанд өнгөрсөн жил хязааландаа айргийн таваар хурдалсан Төв аймгийн Сэргэлэн сумын уугуул, аймгийн Алдарт уяач Баттулгын Сүхбаатарын Дүү хээр, айргийн гурваар хурдалсан Говь-Алтай аймгийн Шарга сумын уугуул Төмөрбаатарын Зулзүсэмийн сартай хонгор болон морин жилийн өнгө тольдох “Дүнжингаравын хурд-2014” уралдаанд түрүүлсэн Дундговь аймгийн Өлзийт сумын уугуул, аймгийн Алдарт уяач Дэмчигцоодолын Эрболдын Тэргүүн хонгор  зэрэг хурдан ажнайгууд тоосоо өргөсөн.
Мөн улс бүсийн наадмын хишигтэй Ховд аймгийн Мөст сумын уугуул Монгол Улсын Алдарт уяач Буднямын Буяннэмэхийн  саарал, Өмнөговь аймгийн Хүрмэн сумын уугуул Аюурзанын Жаргалсайхан хамар цагаан хонгор, Ховд аймгийн Дарви сумын уугуул Батжаргалын Ганзоригийн буурал, Хөвсгөл аймгийн Улаан-Уул сумын уугуул “Түмэн магнай” галын гишүүн Ц.Элбэгзаяагийн хүрэн, Төв аймгийн Алтанбулаг сумын уугуул Батмөнхийн Шагдаржавын хүрэн, Орхон аймгийн Баян-Өндөр сумын уугуул МУ-ын Алдарт уяач Дэмбэрэлийн Дэлгэрбаярын Жигүүр хонгор, Завхан аймгийн Түдэвтэй сумын уугуул Банзрагчийн Отгонбаатарын Асгат хүрэн, Говь-Алтай аймгийн Халиун сумын уугуул, МУ-ын Алдарт уяач Туваанжавын Гантөмөрийн хүрэн буурал, Улаанбаатар хот Сүхбаатар дүүргийн уяач Чимэдийн Дүгэрийн загал, Төв аймгийн Борнуурын сумын харьяат Баатарын Ганхуягийн цавьдар, Говь-Алтай аймгийн Бигэр сумын уугуул Батчулууны Балжиннямын саарал, Төв аймгийн Жаргалант сумын уугуул Дашнямын Тамирын хээр, Ховд аймгийн Дарви сумын уугуул, нийслэлийн Алдарт уяач Үржинбадамын Атарсайханы сартай халтар, Булган аймгийн Сайхан сумын уугуул Сандагийн Нямжавын хүрэн,  Хөвсгөл аймгийн Шинэ-Идэр сумын уугуул, аймгийн Алдарт уяач Чулуунбатын Цэрэнбатын хээр, Төв аймгийн Баянчандмань сумын уугуул Сүхбаатарын Ганхуягийн  зээрд, Өмнөговь аймгийн Цогтцэций сумын уугуул, аймгийн Алдарт уяач  Хүүгийн Түмэнбаярын сартай хонгор зэрэг хурдан хүлгүүд морджээ.  

"Тод магнай" сэтгүүл №55