Уяач Б.Зуунжил: Сувдан цоохор маань ирсэн цагаасаа хурдалж байгаа

"Хотгойдын хурд-3" хангайн бүсийн уралдаанд Сувдан цоохор соёолонгоо аман хүзүүнд хурдлуулсан хийморилог уяач Б.Зуунжилийн сэтгэгдлийг хүргэж байна.

-Сувдан цоохор соёолонгоо нутгийн дэвжээнээ айрагдуулсан хийморилог уяачид баяр хүргэе?
-Баярлалаа. “Хотгойдын хурд-3” хангайн бүсийн уралдаан сайхан болж Сувдан цоохор соёолон маань аман хүзүүдлээ. Цоохор үрээ маань Сүхбаатар аймгийн Эрдэнэцагаан сумын уугуул, яруу найрагч Сумъяагийн Амартайваны унаган адуу. Хоёр жилийн өмнө битүү үрээ авч байсан юм. Надад ирээд шүдлэндээ Шинэ-Идэр суманд болсон Хөдөлмөрийн баатар, академич Ширэндэв гуайн мэндэлсний 100 жилийн ойд айргийн дөрвөөр давхисан. Өнгөрсөн жил сумынхаа наадамд аман хүзүүдээд, бага наадамд гурав түрүүлж, нэг аман хүзүүдсэн. Энэ жил сумынхаа 90 жилийн ойд аман хүзүүдээд, Хотгойдын хурдад бас хоёроор давхилаа. Бага наадамд нэг түрүүлж, нэг айрагдсан.
-Дөрөв дэх уяагаараа Хотгойдын хурдад уралдсан юм уу?
-Энэ жил нийтдээ долоо уралдсан.
-Хурдан хүлгийн уяа тааруулах болсоор хичнээн жил болж байгаа вэ?
-Би 2006 оноос эхлэн морь уяж байгаа.Манай удамд надаас өмнө морь уядаг хүн байгаагүй. Хөдөө малын дэргэд адууны захад өссөн болохоороо сонирхлоо дагаж морь уяж эхэлсэн. Мөн намайг морь уяхад Галт сумын МСУХ-ны дэд тэргүүн Пүрэвдорж, аймгийн Алдарт уяач Баасандорж нар ихээхэн дэмжиж тусалдаг байсан. Энэ завшааныг ашиглаад тэдэндээ баярлаж, талархаж явдгаа хэлье.
-Таны мэндчилгээг дамжуулахдаа таатай байна. Хоймор нутгийн уяачид зүүн зүгийн адуугаар голдуу наадаж байгаа бололтой. Таны хувьд?
-Манай сумын уяачид зүүн зүгээс адуу нэлээд авч байгаа. Миний хувьд бас Сүхбаатар аймгийн Эрдэнэцагаан сумаас хоёр үрээ авчирч, сайхан наадаж байна. Мөн Хөвсгөлийн Тариалангаас улсын Алдарт уяач Доржпүрэв гуайн адуунаас авсан. Иймэрхүү байдлаар адууныхаа удам угшлыг сайжруулж байгаад яваандаа унаган адуугаараа сайхан наадна даа.
-Энэ удаагийн наадмын тухайд ямархан санаа бодолтой байгаа вэ?
-2010 оны “Хотгойдын хурд-2” наадамд хязаалан, соёолон мордуулж 20-30 хооронд давхиулж байсан. Ер нь бүсийн наадамд эрлийз, монгол адуугаа тусад нь уралдуулж байвал зүгээр юм шиг санагддаг. Энэ жилийн “Хотгойдын хурд-3” уралдаан аймгийнхаа наадамтай давхар болсон. Аймгийн наадам гэдэг бас л төрийн наадам. Монгол төрийн наадамдаа монгол адуугаараа уралдаж байвал зүгээр юм уу гэж боддог шүү. Эрлийз адуутайгаа  холиод уралдчихаар хаа холоос зорьж ирсэн хөдөөгийн уяачдын хувьд хүндрэлтэй байгаа юм.
-Саналыг тань уламжлах болно оо. Ярилцсанд баярлалаа.
Б.Долзодмаа