Уяач Б.Буяннэмэх: Жигүүр хул уягдсан цагаасаа хурдалж байгаа буян

-“Хотгойдын хурд-3” хангайн бүсийн уралдаанд Жигүүр хул морио айргийн гурваар хурдлуулсан танд баяр хүргэе. Баярынхаа сэтгэгдлээс хуваалцахгүй юу?
-За баярлалаа. Сэтгэл их өндөр байна. Би анх удаа ийм том наадамд оролцож байгаа хүн. Засгийн газрын тогтоолт бүсийн наадамд анх удаа оролцоод их морь айрагдуулсандаа маш их баяртай байна. Зургадугаар сарын 30-нд Их-Уул суманд болсон аймгийн зүүн бүсийн наадамд Жигүүр хул маань мөн айргийн гурваар хурдалсан.
-Хаанахын адуу вэ?
-Манай Тариалан сумын харьяат, мянгат малчин Нямдорж гэж хүний унаган адуу. Би эх гүүг нь авахад гэдсэндээ ирсэн унага байгаа юм. Уягдсан цагаасаа хурдалж сумын баяр наадамд тав түрүүлж, тав айрагдсан. Аймгийн чанартай бүсийн наадамд гурав айрагдсан  адуу. Одоогоос хоёр жилийн өмнө Булган аймагт болсон бүсийн наадамд хул морьтойгоо очиж айрагдуулж байлаа.
-Буяннэмэх уяач хэзээнээс хурдан хүлгийн уяа тааруулж байгаа вэ?
-Арван жил морь уяж байна. Энэ хугацаанд улсын бүсээс нэг, аймгийн бүсээс гурван айраг, харин сумын баяр наадмаас зургаан түрүү, арав гаруй айраг аваад байна. Ноднин хавар Хөвсгөл аймгийн Эрдэнэбулган суманд болсон аймгийн бүсийн уралдаанд миний азарга хоёроор давхисан. Бас Булган аймгийн Хутаг-Өндөр суманд болсон доод гурван насны уралдаанд үрээ, даага нийлсэн гурван адуутай очиж айрагдуулж байлаа.
-Аймгийн Алдарт уяач уу?
-Одоогоор цол аваагүй л байна. 
-“Хотгойдын хурд-3” уралдаандаа хэдэн насны морьтой очсон бэ?
-Ганц их насны морьтой л очсон. Наадам өргөн дэлгэр сайхан болсон шүү. 
-Бүсийн наадамд уралдсан морьдын ихэнх нь олон давхар уяатай мордож. Жигүүр хулын хувьд?
-Миний хул морь зургадугаар сарын 13-наас хойш олон уралдсан. “Хотгойдын хурд-3” уралдаан 12 дахь наадам нь болж байгаа юм. 
-Дараа дараагийн уралдаануудад амжилт хүсье. Ярилцсанд баярлалаа.
-Баярлалаа. Танай хамт олонд ажлын өндөр амжилт хүсэн ерөөе.
У.Энхмаа