Спортын мастер Л.Батбилэг: Эрийн гурван наадмаа адил тэгш үзэн бай шагналын зөрүүг арилгаасай

Илдэн Вангийн хошуу үүсэн байгуулагдсаны 325, Их бурхант цогцолборыг аравнайлсаны 150, Халхгол сум үүсч байгуулагдсаны 90 жилийн ойн баяр наадмын үеэр сурын харвааг зохион байгуулагч спортын мастер Л.Батбилэгтэй ярилцснаа хүргэж байна.  
-Халхгол сум байгуулагдсаны 90 жилийн ойн баяр наадам амжилттай болж өндөрлөлөө. Үндэсний сурын харвааны төрөлд улс, аймгийн цолтой хичнээн харваачид ирж оролцов?
-Монголын ууган сумдын нэг Халхгол сумын 90 жилийн ойн баяр наадмын үндэсний харваанд МУ-ын Мэргэн дөрөв, аймгийн Мэргэн 10 гаруй, спортын мастер 20 гаруй, нийт 40 гаруй харваачид оролцлоо. Чанар сайтай, оноо өндөртэй харваа болсон. Улсын баяр наадмын оноогоор сумын баяр наадамд л түрүүлж байгаа учраас би ийнхүү онцолж байгаа юм.
- 40 сум тавьсан байх. Дээд тал нь хэд онов?
-Энэ жил Гарамгай мэргэний болзол хангасан Хэнтий аймгийн уугуул Х.Оюунчимэг 40 сумнаас 37 онож түрүүллээ. Эрэгтэйчүүдийн төрөлд спортын мастер, аймгийн Мэргэн, буриад сурын Хошой мэргэн Ойдовын Сүхбаатар 36 онож түрүүллээ. Хоёрдугаар байрт 35 оноогоор Хэнтий аймгийн уугуул, Дорнод аймгийн “Дорнын Гэрэгэ” компанийн харваач Лхагвадорж 34 оноогоор орж байна. Тэгэхээр  их өндөр оноотой наадам болж байгаа биз.
-Дорнод аймаг сурын өлгий нутаг. Халхгол сум маань харваачдаараа аймагтаа хэдэд бичигддэг вэ?
-Халхгол сум эрт дээр үеэсээ харваачид сайтай байсан. Тэдний нэг нь Сүхбаатар мэргэн байна. Мөн Уушаан мэргэн энэ нутгийн хүн. Ер нь манай Дорнод аймагт мэргэн сум бараг байхгүй. Тэгэхээр өөрийн чинь хэлсэнчлэн маргахын аргагүй сурын өлгий нутаг.
-Сумдадаа сурын холбоотой юу?
-Би Дорнод аймгийн Баян-Уул сумын хүн. Аймгийнхаа сурын холбооны тэргүүлэгчээр ажилладаг учраас Халхгол сумын 90 жилийн ойн баярын үндэсний сурыг зохион байгуулж байгаа юм. Манай аймаг энэ жилээс сум болгондоо сурын холбоо байгуулах төлөвлөгөөтэй байгаа юм билээ.Түүнээ зориулж сум болгоны Засаг дарга, ИТХ-ын дарга,Тамгын газрын дарга нарт нь сургалтын нум бэлэглэсэн байгаа. Нум сумтай болно гэдэг маань харваачидтай болохын эхлэл шүү дээ.  Халхгол сумын хувьд бараг 20 гаруй залуу харваач байдаг. Тэд маань энэ удаагийн наадамд бас сайхан харвалаа.
-Бэлгийн морины шүдийг үздэггүй  гэдэг ч  сумдын ойн баяр наадмын сурын харвааны бай шагнал бөх, морьтойгоо ойролцоо байж чадаж байна уу?
-Баян-Уул сумын 90 жилийн ойн баяр наадмын  сурын харваанд түрүүлсэн харваачид сая төгрөгийн шагнал өгсөн. То Вангийн 200 жилийн ойн баяр наадмаар түрүү харваачийг 500.000 төгрөгөөр мялааж байсан.Энэ удаа төсөв мөнгөний хувьд хүндрэлтэй байсан байх. Түрүүлсэн харваачид 300 мянга төгрөг өгч байна лээ. Манай харваачид дэндүү даруухан улс. Бэлгийн морины шүд үздэггүй гээд өгснийг нь аваад төрийн сүлдэндээ залбирч байдаг. Ер нь цаашдаа эрийн гурван наадмаа адил тэгш үзэн бай шагналын зөрүүг арилгавал сайн л байна. Явж явж сурын харваа хамгийн их ачаалалтай спорт шүү дээ. Гурван өдрийн турш халуунд халж, бороонд  норон цэц мэргэнээ сорьдог шүү дээ. 
-Санал нэг байна. Ярилцсанд баярлалаа.
 У.Энхмаа

 

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна