Аймгийн арслан П.Мөнхбат түрүүллээ

Эх орны зүүн хязгаар нутгийн түүхт ойн баяр наадмын уран мэхийг уралдуулсан хүчит бөхийн барилдаанд улсын начин цолтой нэг, аймгийн Арслан цолтой долоо, аймгийн заан цолтой гурав, аймгийн харцага цолтой хоёр, аймгийн начин цолтой гурав, сумын заан цолтой ес, сумын харцага цолтой нэг, сумын начин цолтой тав,  нийт 128 бөх барилдан наадамчин түмнээ цэнгүүлснээс шөвгийн дөрөвт аймгийн арслан П.Мөнхбат, аймгийн хурц арслан Г.Отгонбаатар, улсын начин Ж.Гансүх, аймгийн харцага Э.Батжаргал нар үлдэж, П.Мөнхбат түрүүлэн, Г.Отгонбаяр үзүүрлэсэн. Мөн сумын цол олгох шигшээ 64 бөхийн барилдаанд Дорнод аймгийн Сэргэлэн сумын харьяат, сумын начин Батмөнх түрүүлж, сумын заан, Баянтүмэн сумын харьяат, залуу бөх Самбуудорж үзүүрлэж сумын харцага цол, Халхгол сумын харьяат, залуу бөх Э.Энхтөр, Д.Дэлгэрдалай нар шөвгөрч сумын начин цол тус тус хүртсэн юм.
Түүнчлэн өсвөрийн 32 бөх барилдсанаас Халхгол сумын уугуул Б.Өсөхбаяр түрүүлж, Б.Балдансамбуу үзүүрлэн  наадамчин түмнээ баясгалаа.
Дөрвөн их ой давхацсан хязгаар нутгийн наадам ийнхүү хүчит бөхчүүд нь иртэй, хурдан хүлгүүд нь шандастай, мэргэн харваачид нь цэцтэй байж үзэгч олон, наадамчин түмнээ цэнгүүллээ.
Б.Долзодмаа