Янзага цавьдар

Завхан аймгийн Завханмандал сумын уугуул, аймгийн Алдарт уяач  Цэрэндоржийн Мөнгөнхуягийн Янзага цавьдар Их Монгол улс байгуулагдсаны 808, АХ-ын 93 жилийн ой үндэсний их баяр наадмын хурдан азарганы уралдаанд аравт хурдаллаа. Морин жилийн өнгө тольдох “Дүнжингаравын хурд-2014” уралдаанд айргийн гуравт хурдалсан цавьдар азаргыг морь сонирхогчид эчнээ таньж буй бизээ.
Угшил гарвал: Улс бүсийн наадамд хоёр түрүүлж, хоёр айрагдсан Тод манлай уяач Д.Ононгийн Янзага зээрдийн гал үр. 2010 онд одоогийн эзэн Ц.Мөнххуяг нь Дорнод аймгийн Баянтүмэн сумын уугуул аймгийн Алдарт уяач Сүхийн Жадамбаас битүү даага авч, Төв аймгийн Сэргэлэн сумын уугуул Эрдэнэбатын Баянзулаар уяулах болжээ.
Амжилтын товчоон:
2011 онд шүдлэндээ:
Дорноговь аймгийн Иххэт сумнаа болсон МУ-ын Алдарт уяач Л.Нарангэрэл агсны нэрэмжит уралдаанд аман хүзүү
2012 онд хязааландаа:
Төв аймгийн баяр наадамд найм
2013 онд соёолондоо:
Хэнтий аймгийн Хэрлэнбаян-Улаан сумын баяр наадамд түрүү
Говьсүмбэр аймгийн Сүлд овооны тахилгат түрүү
Говьсүмбэр аймгийн Баянтал сумын наадамд айргийн дөрөв
2014 онд хавчиг азарга:
Баянтал сумын баяр наадамд айргийн гурав
АХ-ын 93 жилийн ой, төрийн наадамд  арваар тус тус хурдалжээ.Эцгийн шийрийг хатаах хурдан хүлэг болоосой гэхдээ Ц.Мөнххуяг уяач цавьдар азаргаа Янзага хэмээн нэрийдсэн бөгөөд ерөөл бэлгэ дагаж энэ хаврын уралдаанд хурдан хүлэг нь айргийн гурваар хурдалж эзэндээ Засгийн газрын тогтоолт наадмын хоёр дахь айргийг нь авчирчээ. 2009 оноос хурдан морь уях болж, 2013 онд аймгийн Алдарт уяач цолоор мялаагдсан Ц.Мөнххуяг  2010 оны “Хотгойдын хурд” хангайн бүсийн уралдаанд сартай зээрд соёолонгоо айргийн гуравт хурдлуулан том наадмын өм нээгдэж байсан гэдэг билээ.

А.Тэлмэн