Ерөөлийн ес хавчиг халтар

Ховд аймгийн Буянт сумын уугуул, Налайх дүүргийн харьяат Ширчинжавын Энхсайханы  халтар азарга АХ-ын 93 жилийн ой, төрийнхөө их баяр наадамд ерөөлийн есөд хурдалсан. Халтар азарганы уяа сойлгыг Төв аймгийн Эрдэнэ сумын уугуул Лувсанравдан уяач тааруулдаг бөгөөд 13 настай Мөнхбаатарын Оргилболд хүү унаж хурдлуулсан юм.
Угшил гарвал: Халтар азарга 20-иод жилийн өмнөөс хурдан морь сонирхон цуглуулах болсон Ш.Энхсайханы унаган адуу нь. Эцэг  хар азарга нь Хэнтий аймгийн Өмнөдэлгэр сумын гаралтай адуу байдаг бол эх буурал гүү нь Сүхбаатар аймгийн Уулбаяны адуу аж.
Амжилтын товчоон: Дааган цагаас уягдан бага наадмуудад байтай давхидаг байсан халтар үрээ өнгөрсөн жил соёолондоо Налайх дүүрэгт болсон хаврын уралдаанд түрүүлж өм нээгджээ. Морин жил гарсаар хаврын хоёр ч уралдаанд түрүүлж, хэдхэн хоногийн өмнө дүүргийнхээ наадамд гуравлаад улсын наадамд ирж есөөр давхисан нь энэ аж. Ерөөл бэлгэдлийн есөд хурдалсан хавчиг халтар азаргыг дараа дараагийн олон амжилтууд хүлээж буй биз ээ.
А.Тэлмэн