Уралдаанч Б.Эрхчөлөө: Хүрэн азарга маань хурдан байлаа

-АХ-ын 93 жилийн ойн баяр наадмын хурдан морины уралдаанд хүрэн азарга унаж айргийн дөрөвт хурдлуулсан дүүдээ баяр хүргэе.
-Баярлалаа. Анх удаа улсын наадамд морь унаж уралдлаа, гоё байна. Хүрэн азарга маань хурдан байлаа.
-Хүрэн азаргатайгаа өмнө нь хаана уралдаж ямар амжилт гаргаж байсан бэ?
-Нэг их том наадамд уралдаагүй ээ. Ноднин Өлзийт суманд түрүүлсэн. Мөн Эрдэнэцагаан сумын бурхан залах наадамд түрүүлж байсан.
-Уралдахын өмнө Эрдэнэбилэг ах нь юу гэж захиж мордуулсан бэ?
-Дээр гараад ирвэл дараад яваарай гэсэн.
-Ер нь улсын чанартай бүсийн наадамд оролцож байсан уу?
-Ноднин Хэнтийн бүсэд шүдлэн үрээ унаж айрагдсан.
-Улсын наадамд анх удаа оролцож байгаа ч таньдаг уралдаанч хүүхдүүдтэй тааралдав уу?
-Тааралдсаан. Аман хүзүүддэг халиун азаргыг унасан Ганхүүг таньдаг. Манай аймгийн Эрдэнэцагааны хүүхэд л дээ.
-Айргийн тавд морьдоо хурдлуулсан хүүхдүүдийг сая төгрөгийн хадгаламжийн эрхээр шагнасан шүү дээ?
-Хадгаламжаа өөртөө л зориулна даа.
-Эрхчөлөө хурдан морь унаад хэдэн жил болж байгаа вэ?
-Гурван жил болж байна. Одоо 13 настай. Морь унаж сураад Гансүх ахынхаа уясан адууг анх унаж байсан.
-Анхны амжилтаа ямар уралдаанаас хүртэж байв?
-Жижиг наадамд л оролцсон доо.
-Ер нь хурдан морь унахын сайхан нь юу байдаг юм бэ?
-Юм юм л байдаг. Айрагдаж, түрүүлэх нь сайхан. Ер нь морио унаад уралдах сайхан.
-Улсын наадмыг залгаад бүсийн наадмууд эхлэх гэж байна. Хүрэн азаргатайгаа бүсэд уралдана биз дээ?
-Дорнодын бүсэд уралдана даа.
-За баярлалаа.

У.Энхмаа