Ламын гэгээний даншигт Д.Батбаяр, Батмөнх даян хааны 550 жилийн ойд П.Баярхүү түрүүллээ

Баянхонгор аймагт Ламын гэгээн Лувсанданзанжанцаны түмэн өлзий гийсний 375 жилийн ой, Говийн бүсийн хурд даншиг наадам боллоо. Баянхонгор аймаг улсын баяр наадмын өмнө аймгийнхаа наадмыг хийсэн агаад энэ удаад цол олгохгүй, зөвхөн даншгийн наадмаа хийсэн юм. Хүчит 256 бөхийг у.х Д.Батболд, Ж.Амартүвшин нар манлайлж барилдсан бөгөөд Говь-Алтай аймгийн Бугат сумын уугуул, улсын начин Дугардоржийн Батбаяр түрүүлж, Баянхонгор аймгийн Бууцагаан сумын уугуул бөх, улсын начин Жаргалсайханы Чулуунбат үзүүрлэлээ. Их шөвөгт Говь-Алтай аймгийн Бигэр сумын харьяат улсын начин Саруултуяагийн Багахүү, Баянхонгор аймгийн Баянбулаг сумын харьяат, аймгийн арслан Болдын Эрдэнэхүү нар шалгарав. Дунд шөвөгт улсын харцага Даш-Очирын Батболд, Жаргалсайханы Амартүвшин, улсын начин Лхагвасүрэнгийн Гантулга, аймгийн арслан Нацагсүрэнгийн Золбоо нар шалгарчээ.
Өмнөговь аймаг Батмөнх даян хааны мэндэлсний 550 жилийн ойн наадмаа тэмдэглэж улсын гарди Д.Рагчаа, Б.Гончигдамба, улсын заан Д.Баасандорж, М.Өсөхбаяр, Б.Батмөнх, Б.Соронзонболд нараар манлайлуулсан хүчит 256 бөх зодогложээ. Бөхийн барилдаанд Архангай аймгийн Эрдэнэмандал сумын харьяат, аймгийн заан Пэрэнлэйжамцын Баярхүү найм даван түрүүлж аймгийн арслан болсон бол, Архангай аймгийн Батцэнгэл сумын харьяат, аймгийн начин Лхагвасүрэнгийн Отгонбаатар долоо даван үзүүрлэлээ. Их шөвөгт Д.Рагчаа, Б.Гончигдамба гардиуд шалгарсан байна. Мөн Өмнөговь аймгийн харьяат, сумын заан Т.Төгсдөлгөөн, Б.Хэрлэн, Дундговь аймгийн харьяат С.Дашдондов нар аймгийн начин болжээ.
Т.Түмэндэмбэрэл