Оргилын хийморь Оодон халтар

Аз хийморь нь цалгисан “Ажнай” галынхан азарганы уралдаанаас нэг түрүү, нэг айраг хүртэн одтой сайхан наадсан билээ.Улаанбаатар хотын Баянзүрх дүүргийн харьяат Бадамын Оргилын Оодон халтар адуун сүргийн манлай азарганы уралдааны айргийн тавд хурдалж, эзэндээ төрийн наадмын анхны айргийг амсуулсан бөгөөд уяа сойлгыг нь морь уях улсын хэрэгт үе дамжин шимтэж буй Дашцэрэнгийн Од-Эрдэнэ /Одгэрэл Манлайн дүү/ уяж хурдлуулдаг юм.Ингээд эрхэм танаа Оодон халтар азаргыг товч танилцуулъя.
Угшил гарвал:Сүхбаатар аймгийн Дарьганга сумын уугуул Пүрэвсүрэнгийн унаган адуу.Илүү дэлгэрүүлбэл төрийн наадмын түрүү Богд халтар азарганы эзэн Рагчаасүрэнгийн төрсөн дүүгийн адуу юм. Оодон халтар улс бүсийн наадамд хоёр түрүүлж, нэг айрагдаад буй Богд халтартай эцэг нэгтэй гэгддэг.Халтар азаргыг одоогийн эзэн нь 2011 онд хязаалан үрээ /хоёр гурван медельтай/авч байсан агаад Богд халтар төдийлөн тодроогүй байсан үе юм. Амжилтын товчоон:
2011 онд хязааландаа:
Алтан-Овооны бага тахилга наадамд аман хүзүү /Тэрхүү наадамд МУ-ын Алдарт уяач Б.Далайгийн халтар азарга түрүүлж байжээ/
Төв аймгийн Лүн суманд болсон уралдаанд аман хүзүү
“Говьшанхын хурд-4” говийн бүсийн уралдаанд арав гаргаж давхисан
2012 онд соёолондоо:
АХ-ын 91 жилийн ойн баяр наадамд 17
2013 онд хавчиг азарга:
АХ-ын 92 жилийн ойн баяр наадамд 13
2014 онд долоотой азарга:
АХ-ын 93 жилийн ойн баяр наадамд айргийн гуравт тус тус хурдалжээ. Жижгэвтэр биетэй, оодгор сүүлтэй үрээндээ эзэн нь Оодон халтар хэмээх нэрийг хайрласан бөгөөд хаврын уралдаануудад төдийлөн амжилт үзүүлдэггүй болохоор мордуулдаггүй гэх юм билээ.

А.Тэлмэн