“Ажнай” галын гишүүн Б.Оргил: Уяач бүрийн мөрөөдлийг биелүүлсэндээ омогшиж байгаа

-Их цэнгэл наадамдаа хурдан азаргаа айрагдуулсан танд баяр хүргэе.Баярынхаа сэтгэгдлээс хуваалцаач?
-Баярлалаа. Ардын Хувьсгалын 93 жилийн ойн баяр наадамд миний Оодон халтар азарга айргийн тавд  хурдалж,сайхан наадлаа.
-Оодон халтарын эзэн хэзээнээс хурдан хүлгийн уяа тааруулах болсон бэ?
-Зургаан жил болж байна. Би гурван Тод манлай уяачтай "Ажнай" галын гишүүн. Анх галынхныхаа морийг дэмжих гэж морь үздэг байсан бол яваандаа өөрөө сонирхож эхэлсэн. Морин уралдаан гэдэг шимтэхгүй байхын аргагүй сайхан зүйл л дээ. Эрийн хийморь өргөсөн хурдан морьтой хувь заяагаа холбон тулхтай уяачдынхаа дэмжлэгтэйгээр өнөөдөр төрийн наадмын айраг хүртсэндээ маш их баяртай байна.
-Халтар азарганы амжилт төрийн наадмын анхны хишиг үү?
-Тиймээ.Түүнээс 2011 онд “Говьшанхын хурд-4” говийн бүсийн уралдаанд бор морио гурваар давхиулж байсан.Түүнээс хойш ер нь их эрчимтэй оролдож эхэлсэн шүү.
-Бүсийн наадмын анхны айргийг авчирсан хурдан хүлгээ танилцуулаач?
-Сүхбаатар аймгийн Дарьганга сумын харьяат Төмөрбаатар гэж хүний унаган адуу. Морь уяад хамгийн анх 2010 онд Баянцогт сумын наадамд айрагдуулж байлаа. Түүнээс хойш дөрвөн жил төрийнхөө наадамд морьдоо мордуулан тоосыг өргөж байгаа. Уржнан соёолон 17-гоор, ноднин соёолон 12-оор давхисан.
-“Ажнай” галынхан азаргаар голдуу нааддаг улс. Та ч гэсэн тэрхүү буухиаг нь үргэлжлүүлж байна?
-Тиймээ, манай галын нэг азарга түрүүлж, нэг азарга айрагдлаа. Түүнээс өмнө гурван жил дараалан улсын наадамд азарга түрүүлгэсэн Д.Бат-Эрдэнэ Тод манлай манай галын гишүүн. Ер нь манайхан азаргаар сайхан нааддаг шүү. Уяач хүн бүр төрийн наадамд азарга түрүүлгэхийг мөрөөддөг байх. Тэр ч утгаараа би маш их омогшиж байгаа.
-Халтар азаргаа айрагдана хэмээн таамаглаж байв уу?
-Би хоёр халтар азарга мордуулсан.Оодон халтар энэ жил долоотой, нөгөө нь хавчиг азарга байгаа юм.Хоёулаа их хурдан байсан болохоор арав дотор багтана гэдэгт итгэлтэй байсан. Харин нэг нь ч гэсэн айрагдчихаасай л гэж бодож, залбирч байлаа.
-Хавчиг халтар нь хэдээр давхисан юм бэ?
-Халтар азарга хорин хэдээр давхисан.
-Азарганаас бусад нас яаж давхив?
-Улсын наадамд хоёр азарга л мордуулсан. Харин Баянцогт суманд дөрвөн нас мордуулаад азарга түрүүлж, соёолон айрагдсан.
-Ингэхэд Оодон халтарын эзэн аль нутгийн хүн бэ?
-Улаанбаатар хотын Баянзүрх дүүргийн хүн. Хотод төрж өссөн гэлтгүй морь гэдэг монгол хүний цусанд байдаг гэдэг нь үнэн юм байна.
-Улсын наадмыг бүсийн уралдаанууд залгадаг. Хаашаа явж наадахаар төлөвлөж байгаа вэ?
-Хөвсгөл явж “Хотгойдын хурд” хангайн бүсийн наадамд уралдах санаатай байна. Гэхдээ уяачтайгаа зөвлөлдөнө.Миний азаргыг нийслэлийн Алдарт уяач Од-Эрдэнэ гэдэг залуу уядаг.

У.Долгормаа