Сэлэнгэ аймагт Нэгдэлийн Жаргалбаяр хурцалж, Дорнодод Доржийн Анар түрүүллээ

Сэлэнгэ аймгийн баяр наадамд тус аймгийн харьяат улс, аймаг, цэргийн цолтой хүчит 256 бөх зодоглон барилдав.
Бөхийн барилдаанд 2013 оны наадмын түрүү бөх, Сэлэнгэ аймгийн Мандал сумын уугуул, "Увс нуур" дэвжээний дэвжээний бөх, Монгол Улсын начин Нэгдэлийн хүү, аймгийн арслан Жаргалбаяр найм даван түрүүлж аймгийн хурц арслан болжээ. Үзүүрт 2004 оны Сэлэнгэ аймгийн наадмын үзүүр бөх, аймгийн арслан Эрдэнэжавын хүү, аймгийн заан Саранбаатар үлдэн мөн цолоо баталжээ. Их шөвөгт Сайхан сумын харьяат, сумын заан Жавхлантын хүү, аймгийн харцага Мандахбаяр үлдэж цолоо баталсан бол, аймгийн арслан Б.Бямбаагийн хүү, сумын заан Батбаяр зургаа давж харцага болжээ. Дунд шөвөгт Сант сумын харьяат, аймгийн заан Батцэнгэлийн Эрдэнэбаяр, Мандал сумын харьяат, аймгийн нэмэх начин Наранцэцэгийн Энхжаргал, Түшиг сумын харьяат, аймгийн начин Майбаатарын Жаргалсайхан нар тав давж чимэг нэмсэн бол Баянгол сумын заан Батчулуун тав давж аймгийн начин болжээ.

Зүүн бүсийн хурд 2014, Дорнод аймгийн баяр наадамд у.н Ж.Гансүх, Д.Цогзолдорж нарын тэргүүтэй хүчит 256 бөх зодоглов.
Бөхийн барилдаанд Дорнод аймгийн Дашбалбар сумын харьяат, аймгийн начин Доржийн Анар найм даван түрүүлж аймгийн арслан цолд хүрсэн бол Цагаан-Овоо сумын харьяат аймгийн начин Дашнямын Ариунмөрөн долоо даван үзүүрлэлээ. Их шөвөгт улсын начин Д.Цогзолдорж, аймгийн заан Х.Алтансүх нар шалгарав. Мөн Халхгол сумын заан Бямбадоржийн Батдорж, Сэргэлэн сумын начин Лхагвасүрэнгийн Чадраабал, Баян-Уул сумын начин Ганболдын Төрмөнх нар аймгийн заан Э.Саранбаатар, аймгийн арслан П.Мөнхбат, Б.Батхуяг нараар тав давж аймгийн начин цолд хүрчээ. Мөн улсын начин Ж.Гансүх тав давжээ. Булган сумын харьяат аймгийн нэмэх начин Г.Эрхэмбаяр тавын даваанд түрүү бөхтэй тунаад нэлээн ойролцоо газардсан ч цэцүүд Анарыг давуулсан байна. Мөн Булган сумын бөх, сумын заан Шинэзориг аймгийнхаа наадамд хоёр дахь удаагаа дөрөв даваад унасан бол аймгийн арслан Арсланбаатарын зээ хүү, сумын заан Г.Гантулга начны даваанд шороодсон байна.

Т.Түмэндэмбэрэл