Төрийн наадмын хишиг Сартай хүрэн

Дуу хуурын өлгий нутгийн амжилтын буухиаг Эрдэнэдалай сумын уугуул  Содномцэрэнгийн Цэмбэл үргэлжлүүлж сартай хүрэн азаргаа айрагдуулан  түмэн олныхоо магнайг тэнийлгэлээ. Адуун сүргийн манлай азарганы уралдаанд айргийн дөрөвт хурдалсан энэ хурдан буян өнгөрсөн жил төрийнхөө баяр наадамд зарлагдаж байгаад суусныг морь сонирхогчид санаж буй бизээ. Ингээд эрхэм танаа хурдан хүрэнийг танилцуулъя.
Угшил гарвал:Сүхбаатар аймгийн Халзан сумын уугуул Манлай уяач Ухна агсны хүү МУ-ын Алдарт уяач У.Эрдэнэбилэгийн унаган адуу. Хүрэн азарганы эцэг нь Дорнодын зүүн бүсийн уралдаанд гурвалж байсан У.Гансүхийн хурдан хүрэн азарга. Харин эх нь 1999 оны Алтан-Овооны их тахилга наадамд түрүүлсэн  халиун азарганы маань угшилтай гүү байдаг.Ийнхүү хоёр талаас хурдны угшилтай сартай хүрэн азаргыг эзэн нь дааган цагаас нь уяж хурдлуулж жижиг наадмуудад хэд хэд түрүүлж айрагдуулжээ.
Амжилтын товчоон:
2012 онд хязааландаа:
Сүхбаатар аймгийн аварга хүлэг шалгаруулах “Жавхлант шаргын хурд” уралдаанд аман хүзүү
Сүхбаатар аймгийн 70 жилийн ой зүүн бүсийн уралдаанд арав дотор
2013 онд соёолондоо:
“Дүнжингаравын хурд-2013”хаврын бүсийн уралдаан амжилттай давхисан
Хэнтий аймгийн 90 жилийн ой, зүүн бүсийн уралдаанд амжилттай давхисан
2014 онд хавчиг азарга:
АХ-ын 93 жилийн ойд айргийн дөрөв
"Дорнод талын хурд-2014" зүүн бүсийн уралдаанд айргийн тавд тус тус хурдалжээ.