С.Цэмбэл: Анх удаа төв асрынхаа өмнө цоллуулж байгаа нь энэ

Их Монгол Улс байгуулагдсаны 808, АХ-ын 93 жилийн ой, төрийн их баяр наадамд хүрэн азарга нь айргийн дөрөвт хурдалсан Дундговь аймгийн Эрдэнэдалай сумын уугуул С.Цэмбэл гуайн сэтгэгдлийг хүргэж байна.

-Хүрэн азарга тань айргийн дөрвөөр хурдаллаа. Баяр хүргэе?
-Баярлалаа. Баяр наадам сайхан болж байна. Хүрэн азарга маань төр түмнийхээ их баяр цэнгэлд айргийн дөрвөөр давхилаа. Сэтгэл их өндөр байна.
-Дуу хуурын өлгий нутгийнхан сүүлийн жилүүдэд одтой сайхан наадаж байгаа. Энэ удаад гэсэн бараг нас болгонд айрагдууллаа?
-Тэглээ. Би  Дундговь аймгийн Эрдэнэдалай сумын хүн. Энэ жил улсын наадамд манай аймгаас шүдлэн, их нас, азарга айрагдлаа. Ер нь манай аймаг дээр үеэсээ хурдтай газар. Манай аймгийн олон уяач төрийнхөө их баяр наадамд уясан морио түрүүлгэж айрагдуулж байсан.
-Азарганаас бусад нас яаж давхив?
-Улсын наадамд бол ганц хүрэн азаргатайгаа ирсэн. Ер нь сайхан хурдан буянгууд бий бий. Сүхбаатарын Асгат сумаас шүдлэнд нь авсан сартай хээр морь маань Чойрт болсон бүсийн наадамд шүдлэндээ айрагдаж, Дундговь аймгийн 70 жилийн ойд долоолж байсан.
-Бүсийн наадамд шүдлэн үрээ айрагдуулж байсан хэдий ч анх удаа улсын наадамд морь айрагдуулаад төв цэнгэлдэхдээ орох гэж байна. Хэр догдолж байх юм?
-Сэтгэл өндөр байлгүй яахав. Анх удаа төрийн наадамд азарга айрагдуулж төв асартаа очиж цоллуулах гэж байгаа болохоор жаахан сандарч л байна. Манай уяач өмнө нь айраг түрүү авч асартаа цоллуулж байсан болохоор туршлагатай хүн л дээ. Тэгж бодохоор бага зэрэг тайвшраад л...
-Ярилцсанд баярлалаа. Дараа дараагийн уралдаануудад тань амжиль хүсье.
-Баярлалаа. Танай сэтгүүлээр дамжуулаад 93 жилийн ойдоо морь түрүүлгэж, айрагдуулсан бүх уяачдадаа баяр хүргэхийн сацуу Монголынхоо нийт ард түмэнд сайн сайхан бүхнийг хүсэн ерөөе.

 У.Энхмаа