Хоймор нутгийн хийморь халиун

Хоймор нутгийн хүүгийн хийморийг өргөж, хотол олон түмнийхээ цэнгэлийг даллан хурдалдаг Т.Болдбаатарын халиун азарга АХ-ын 93 жилийн ой, төрийнхөө их баяр наадамд аман хүзүүнд хурдаллаа. Уралдсан цагаас хойш улс бүсийн наадмаас нэг түрүү, дөрвөн айраг хүртээд буй халиун азарга хоёр талын хурдны удамтай хүлэг гэдгийг морь сонирхогчид эчнээ мэдэх биз ээ. Тиймээс эрхэм та бүхнээ халиун азарганы угшил гарвал, амжилтын товчооныг товчхон сануулъя.
Угшил гарвал: Эцэг талаасаа Халзан сумын наадамд есөн жил дараалан түрүүлж айрагдсан Д.Цэвэгсүрэнгийн халтар азарганы угшилтай. 1977 оноос эхлэн сумынхаа наадамд дөрөв түрүүлж, гурав аман хүзүүдэн, гурав айрагдсан хурдан халтар азарганы төл халтар үрээг тус сумын уугуул Энэбиш агсан авч, азарга тавьсан бөгөөд халиун үрээний эх халтар гүү түүний төл юм. Харин эцэг нь Халзан сумын уугуул, аймгийн Алдарт уяач Мөнхсүрэнгийн шарга азарга. Шарга азарга мөн л Д.Цэвэгсүрэнгийн халтарын угсааны адуу. Тиймээс Т.Болдбаатарын халиун азарга хоёр талаасаа Д.Цэвэгсүрэнгийн хурдан халтарын цустай адуу юм.
Амжилтын товчоон:
2011 онд шүдлэндээ:
-Хөвсгөл аймгийн 80 жилийн ойд аман хүзүү
-Өвөрхангай аймгийн 80 жилийн ойд айргийн дөрөв
2012 онд хязааландаа:
-Сүхбаатар аймгийн тэргүүн хүлэг шалгаруулах “Жавхлант шаргын хурд” уралдаанд түрүү
-Сүхбаатар аймаг байгуулагдсаны 70 жилийн ой, зүүн бүсийн наадамд айргийн гурав
2013 онд соёолондоо:
Сүхбаатар аймгийн тэргүүн хүлэг шалгаруулах “Жавхлант шаргын хурд” уралдаанд аман хүзүү
“Дүнжингаравын хурд-2013” хаврын бүсийн уралдаанд айргийн тав
“Эрдэнэт хурд-2013” бүсийн уралдаанд аман хүзүү
АХ-ын 92 жилийн ой үндэсний их баяр наадамд ес
Хэнтий аймгийн 90 жилийн ой, зүүн бүсийн уралдаанд түрүү
2014 онд хавчигтаа:
АХ-ын 93 жилийн ой үндэсний их баяр наадамд аман хүзүү
“Хотгойдын хурд-3” бүсийн наадамд айргийн гурав
А.Тэлмэн