Архангай, Булган хангайн наадмууд

Архангай аймгийн баяр наадамд 256 бөх зодоглон барилджээ. У.з Д.Хишигдорж, у.х Г.Батбаяр, у.н Д.Пэрэнлэйдорж, у.н Б.Амарзаяа нараар манлайлуулсан хүчит бөхийн барилдаанд Архангай аймгийн Хашаат сумын харьяат, аймгийн заан Балжиннямын Мөнх-Эрдэнэ 8 даван түрүүлж аймгийн арслан цолд хүрчээ. Харин үзүүрт Архангай аймгийн Цэнхэр сумын харьяат, сумын заануудын барилдаанд тун сайн барилддаг Бямбасүрэнгийн Баатарсүрэн хүрсэн байна. Их шөвгийн дөрөвт өнгөрсөн жилийн Дундговь аймгийн наадамд одоогийн а.а Э.Дашаар 5 давж начин цолд хүрсэн Цэнхэрийн Цэнд-Аюушийн Цогт-Эрдэнэ хүрсэн байна. Тэрээр О.Барбаатар, Ц.Ганбат, Л.Отгонбаатар нарын шилдгүүдийг давж харцага болсон байна. Мөн Чулуут сумын харьяат Пэрэнлэйн Жавхлантөгс албан ёсоор аймгийн цолд хүрчээ. Мөн олон жил амжилттай сайн барилдсан Тариатын Очирбатын Барбаатар аймгийн начин болж наадамчдаа баясгасан бол Батцэнгэлийн Б.Эрдэнэ-Очир, Чулуутын Л.Бат-Амгалан, бөхийн өргөөнд тун сайн хүч үздэг Хангай сумын Баяраагийн Мөнхтулга нар начин болжээ. Хотонтын Болдбаатарын Жамбалсүрэн Лхагвасүрэнгийн Шинэбаатараар 4 давсан ч түрүү бөхөд унасан байна. Мөн олны найдвар хүлээсэн Цэрэндоржийн Ганбат тавын даваанд Ц.Цогт-Эрдэнэтэй тунаж унажээ.
Тавын даваа
1. Г.Батбаяр у.х – П.Жавхлантөгс с.з
2. Д.Пэрэнлэйдорж у.н – Б.Эрдэнэ-Очир с.з
3. Б.Амарзаяа у.н – Л.Бат-Амгалан с.з
4. М.Бат-Отгон а.а – Б.Мөнхтулга с.з
5. Ч.Ганзориг а.а – Б.Баатарсүрэн с.з
6. У.Батгэрэл а.а – О.Барбаатар с.з
7. Б.Мөнх-Эрдэнэ а.з – Б.Жамбалсүрэн с.з
8. Ц.Ганбат а.н.н – Ц.Цогт-Эрдэнэ а.н
Зургаагийн даваа
1. Б.Мөнх-Эрдэнэ а.з – Б.Эрдэнэ-Очир с.з
2. Ц.Цогт-Эрдэнэ а.н – О.Барбаатар с.з
3. П.Жавхлантөгс с.з – Л.Бат-Амгалан с.з
4. Б.Баатарсүрэн с.з – Б.Мөнхтулга с.з
Долоогийн даваа
1. Б.Мөнх-Эрдэнэ а.з – П.Жавхлантөгс с.з
2. Ц.Цогт-Эрдэнэ а.н – Б.Баатарсүрэн с.з
Наймын даваа
1. Б.Мөнх-Эрдэнэ а.з – Б.Баатарсүрэн с.з
Булган аймгийн наадамд у.х Ж.Бор, у.н С.Дэлгэрбат, у.н Б.Бадрал нарын тэргүүтэй хүчит 256 бөх зодоглов. Олон бөх тойргийн цолтой барилддаг энэ наадамд Могодын Өрнөхбаярын Сүхбат 8 даван түрүүлж аймгийн арслан болжээ. Хутаг-Өндөрийн Мягмардорж тойргийн заан цолтой барилдаж албан ёсоор заан цол хүрсэн бол Монголын самбо бөхийн нүүр царай Батбаярын Ариун-Эрдэнэ арслан нутагтаа зодоглож арслан цолдоо чимэг нэмээд Даваадоржийн Мягмардоржид барилдалгүйгээр элэг бүсээ тайлсан байна. Мөн улсын өсөх идэр, өрнөн дэлгэрэх начин Энхбатын дүү Энх-Амгалан аргагүй сайн бөх болохоо харуулж нэг нутгийн Эрдэнэбулганы Чимэддорж, Сайханы Дамдинсүрэнгийн Пүрэвдорж нараар 6 давж түрүү бөхийн сугадаж хавираад тун дөхүүлсэн ч тахим өгч аймгийн харцага болсон байна. Дэлгэрбат начин өөрийн хүүг цолд хүргэж, Тэшигийн П.Бадамдорж, Сайханы Ганпүрэвийн Ганбаатар нар начин болсон бол жүдогийн Пүрэвдорж Хөвсгөлийн Лхагвасүрэнгийн Энхбатаар тав давж чимэг нэмжээ. Эрдэнэбулганы Чимэддорж тойргийн заан цолтой барилдаж сумын заан Энх-Амгаланд, Энхбатын Сумьяабат сумын заан цолтой зодоглож тойргийн заан Д.Мягмардоржид тус тус өвдөглөж цолны даваанаас мултарсан байна.
Тавын даваа
1. С.Дэлгэрбат у.н – Д.Алтангэрэл с.з
2. Б.Ариун-Эрдэнэ а.а – Б.Эрдэнэсайхан с.з
3. Б.Амбасэлмаа а.з – П.Бадамдорж с.з
4. Д.Мягмардорж а.з – Э.Сумьяабат с.з
5. Б.Мөнхбат а.з – Ө.Сүхбат а.н
6. О.Зургаадай а.з – Г.Ганбаатар с.з
7. Э.Чимэддорж а.з – Э.Энх-Амгалан с.з
8. Д.Пүрэвдорж а.х – Л.Энхбат а.х
Зургаагийн даваа
1. Б.Ариун-Эрдэнэ а.а – Д.Алтангэрэл с.з
2. Д.Мягмардорж а.з – П.Бадамдорж с.з
3. Ө.Сүхбат а.н – Г.Ганбаатар с.з
4. Д.Пүрэвдорж а.х – Э.Энх-Амгалан с.з
Долоогийн даваа
1. Б.Ариун-Эрдэнэ а.а – Д.Мягмардорж а.з
2. Ө.Сүхбат а.н – Э.Энх-Амгалан с.з
Наймын даваа
1. Д.Мягмардорж а.з - Ө.Сүхбат а.н
Т.Түмэндэмбэрэл