Уяач Г.Оюунболд: Монгол адууны үнэлэмжийг дээшлүүлэх цагаа олсон уралдаан болж байна

Одоогоос 20 жилийн өмнө “Монгол адуу” нийгэмлэгийн таван жилийн ойгоор анх удаа зохион байгуулагдаж байсан холч морьдын уралдаан өнгөрсөн жилээс баяр наадмын хөтөлбөрт албан ёсоор багтах болсон. Энэ жилийн холч морьдын уралдаан 7-р сарын 10-нд болсон бөгөөд 30 гаруй хурдан хүлэг 60 км замыг өртөөчлөн туулсан юм. Энэ удаагийн уралдааны халтар морь нь аман хүзүүнд хурдалсан Хан-Уул дүүргийн уяач Ганболдын Оюунболдоос цөөн асуултанд хариулт авснаа хүргэж байна.
-60 километрийн өртөөлчилсөн уралдаанд таны халтар морь аман хүзүүнд хурдалсан юм байна. Баяр хүргэе?
-Баярлалаа. Эрт дээр үеэсээ Монголчууд морин өртөөг бий болгон, олон зуун км замыг мориороо туулдаг байсан. Өгөөдэй хааны үүсгэн байгуулсан морин өртөө өнөөдрийг хүртэл ийнхүү үргэлжилж буйд би хувьдаа талархаж явдаг юм. Тэр утгаараа энэ уралдаанд манай уяанаас хоёр ч морь оролцож, аман хүзүү, айргийн гурваар хурдаллаа. Миний халтар морь түрүүлдэг морьтой урд хойноо орж уралдсаар аман хүзүүдсэн.
-Монгол адууны шандсыг шалгаж, үнэ цэнийг нэмэгдүүлэх зорилготой хэмээн зохион байгуулагчид нь онцолсон. Харин та хувьдаа хэрхэн үзэж байгаа вэ?
-Тэгэлгүй яахав. Монгол морины тэсвэр хатуужлыг шалгасан сайхан уралдаан болж байна. Цаашид цар хүрээг нь улам бүр тэлж, олон аймгийн уяачдыг хамруулах нь зүйтэй байх. Ер нь сүүлийн жилүүдэд шинэ цагийн монгол адуу хурдаараа ноёлон монгол адууны үнэ цэнэ буурах хандлагатай байгаа. Тиймээс энэ уралдааныг цагаа олж  зохион байгуулагдаж байна гэж бодож байна.
-Мориныхоо угшил гарвалын талаар танилцуулаач?
-Сүхбаатар аймгийн Эрдэнэцагаан сумын адуу.
-АХ-ын 93 жилийн ойн уралдааны өөр бусад ангилалд  морь мордуулсан уу?
-Даага мордуулж, 12-оор давхиуллаа.
-Дараа дараагийн уралдаануудад тань амжилт хүсье.
-Баярлалаа.
Холч морины уралдаан ОУ-ын хэмжээнд 15 жилийн өмнөөс зохион байгуулагдах болсон бөгөөд 120 км өртөөчилсөн уралдаанд манай тамирчид амжилттай оролцож байсан билээ. Жишээлбэл
Катар хотноо болсон уралдаанд МУ-ын Алдарт уяач  Д.Хорлоодой агсан, спортын мастер Азчулуун   нар оролцож байсан бол  Кавказад болсон уралдаанд монголын хоёр тамирчин 7000 км зам туулан хоёр морьтой очиж байсан юм.Түүнчлэн энэ уралдааны тамирчдаас Монголын морин спортын мастер таван хүн төрөн гарсныг дуулгахад таатай байна.
Б.Долзодмаа