Хөвсгөл аймгийн “Зүүн бүсийн хурд-2014” уралдаан боллоо

Хөвсгөл аймгийн “Зүүн бүсийн хурд-2014”  хурдан морины уралдаан хаврын тэргүүн сарын шинийн 15-нд Их-Уул суманд болох байсан бөгөөд цаг үеийн нөхцөл байдлаас шалтгаалан хойшлогдоод байсан билээ.
Энэ уралдааныг Хөвсгөл аймгийн Дэлтэй Цэнхэр МСУХ, Их-Уул сумын Их-Уул сумын Засаг Даргын Тамгын Газар, сумын засаг дарга Б.Мянганбаяр тэргүүнтэй “Их-Уулын хүлэг” Морин Спорт Уяачдын холбоод хамтран зуны дунд сарын шинийн гуравны билэгт сайн өдөр буюу 2014 оны 06-р сарын 30 ны өдөр Хайрхан Их-Уулынхаа бэл, хатан Сэлэнгэ мөрнийхөө хөвөөнд зохион байгуулж сайхан наадлаа. Тус уралдааны зохион байгуулалтад "Дэлтэй Цэнхэр" МСУХ-ны нарийн бичгийн дарга Т.Болдбаатар оролцсон бол мэдээллийн ивээн тэтгэгчээр "Эх Орон" телевизийн “Түмний эх” энтертайментийн уран бүтээлчид, гэрэл зурагчнаар ЭМШИУС-ийн оюутан Б.Батбаяр нар оролцсон билээ.
Уралдаанд Хөвсгөл аймгийн Тосонцэнгэл, Их-уул, Тариалан, Эрдэнэбулган, Түнэл, Бүрэнтогтох, Мөрөн, Рашаант зэрэг сумын дээд гурван насны 300 шахам хурдан хүлгэд шандас шалган уралдсанаас:
Азарга
1. Их-Уул сумын уугуул "Итгэлт Хүлэг" ХХК-ийн захирал, Их-уул сумын нутгийн зөвлөлийн дарга Дэнзэнгийн Энхтөрийн хул азарга. Хул азарга 2013 онд Рашаант сумын 90 жилийн ойд айрагдаж байсан. 2014 оны Хөвсгөл аймгийн Төвийн бүсийн уралдаанд айргийн таваар хурдалж байсан хурдан хүлэг. Хул азарганы уяа сойлгыг Их-Уул сумын уяач Пүрэвдорж тааруулж байгаа юм.
2. Их-Уул сумын уяач Батсүрэнгийн Ганболдын хүрэн азарга. Хавчиг хүрэн азарга Сүхбаатар аймгийн Халзан сумын уяач Ц.Эрдэнэдалайн унаган адуу бөгөөд 2013 оны Хөвсгөл аймгийн баяр наадамд соёолондоо айргийн гуравт, Эрдэнэбулган суманд болсон хаврын бүсийн уралдаанд түрүү магнайд, 2014 оны Хөвсгөл аймгийн бүсийн уралдаанд зургаад, Архангай аймгийн Хайрхан суманд болсон хаврын бүсийн уралдаанд айргийн дөрөвт давхиж байсан идэрхэн хурдан азарга.
3. Хөвсгөл аймгийн Их-Уул сумын уяач Б.Батцэнгэлийн хээр алаг азарга. Алаг азарга сум орон нутгийн чанартай олон наадамд айраг, түрүүнд хурдалж байсан, сумыгхаа довтой хурдан азаргануудын нэг гэдгээ батлан айрагдлаа.
4. Хөвсгөл аймгийн Их-Уул сумын уяач Б.Мөнхбатын Бөхөн хонгор азарга
5. Хөвсгөл аймгийн Тариалан сумын уяач Ө.Батбаярын халтар азарга. Халтар азарга өмнө нь Хөвсгөл аймгийн 2014 оны Төвийн бүсийн уралдаанд 10-т хурдалж байсан.
Их нас:
1. Хөвсгөл аймгийн Их-Уул сумын залуу уяач Даваасүрэнгийн Ганзамын хурдан халзан морь.Халзан морь 2013 оны Хөвсгөл аймгийн төвийн бүсийн уралдаанд айргийн  тавд, Эрдэнэбулган суманд болсон зүүн бүсийн уралдаан мөн айргийн таваар хурдалж байсан бол ийнхүү унаган нутагтаа болсон бүсийн уралдаанд түрүү магнайлжээ.
2. Хөвсгөл аймгийн Рашаант сумын уяач Ц.Нармандахын бор морь. Бор морь Сүхбаатар аймгийн Мөнххаан сумын Баярцогт гэдэг хүний унаган адуу Рашаант сумынхаа наадамд завсаргүй  гурван удаа түрүүлснээс өнгөрсөн жил сумынхаа түүхт 90 жилийн түрүү магнай болсон энэхүү уралдаанд аман хүзүүдэн айргаар мялаалгажээ.
3. Хөвсгөл аймгийн Тариалан сумын уяач Б.Буяннэмэхийн “Жигүүр хул”. Хул морь 2014 оны Хөвсгөл аймгийн төвийн бүсийн уралдаанд айргийн гуравт хурдалж байсан бол энэ уралдаан мөн л айргийн гуравт хурдалж аймгийн бүсийн наадмаас хоёр дахь айргаа авчээ.
4. Хөвсгөл аймгийн Их-Уул сумын уяач Г.Бум-Эрдэнийн шарга морь. Шарга морины уяа сойлгыг аймгийн алдарт уяач Б.Ганзориг тааруулдаг бөгөөд сум орон нутгийн чанартай наадмуудад олон айраг, түрүү авч байсан хүлэг билээ.
5. Хөвсгөл аймгийн Бүрэнтогтох сумын уяач Л.Баярхүүгийн хээр морь. Хээр морь сум орон нутагтаа энэ цаг үед тодорч буй онц хурдан хүлэг бөгөөд ийнхүү айргийн таваар алтан жолоо өргүүлжээ.
Соёолон:
1. Хөвсгөл аймгийн Тариалан сумын уяач Ө.Батбайгалийн шарга үрээ
2. Хөвсгөл аймгийн Их-Уул сумын уяач Ч.Нанжидсүрэнгийн Үйзэн хонгор үрээ. Хөвсгөл аймгийн баяр наадамд шүдлэндээ түрүү, хязаалан аман хүзүүдэж байсан. "Дэлтэй Цэнхэр" МСУХ-ны нэрэмжит “Шилдэг хүлэг” уралдаанд дааган цагаасаа завсаргүй гурван жил дараалан айрагдсан. 2014 оны төвийн бүсийн хаврын уралдаанд айрагдаж байсан нэрт хурдан хүлэг гэдгийг нийт морь сонирхогчид уяачид андахгүй биз ээ.
3. Хөвсгөл аймгийн Мөрөн сумын уяач "Лидер Кашемир" ХХК-ийн захирал Лхагвасүрэнгийн Ганболдын ягаан саарал. Саарал үрээний уяа сойлгыг Д.Батбаяр тааруулдаг билээ.
4. Хөвсгөл аймгийн Тосонцэнгэл сумын уяач Дашзэвэгийн Гэндэнсүрэнгийн  халтар үрээ. Сүхбаатар аймгийн Халзан сумын унаган адуу. ШүдлэндээТосонцэнгэл сумандаа аман хүзүү, хязаалан Түнэлд суманд аман хүзүү, 2013 оны "Дэлтэй Цэнхэр"-ийн нэрэмжит -Шилдэг хүлэг- уралдаанд айргийн гуравт хурдалж байсан хурдан халтар үрээ ийнхүү аймгийн бүсийн уралдаанд хоёр дахь удаагаа айрагдаж байгаа юм байна.
5. Хөвсгөл аймгийн Их-Уул сумын уяач Б.Энхмэндийн “Гурван цагаан” үрээ айргийн тавд хурдалжээ.
Иинхүү нар хур тэгширсэн зуны дунд сарын шинийн гуравны уралдаан өргөн дэлгэр болж Хөвсгөлчүүд айсуй яваа Хотогойдын даншиг наадамдаа бэлтгэж, хөдөө нутагт хүүхдийн гийнгоо цангинаж, хүлгийн шандас чангарсан зуны цаг  үргэлжилсээр...
"Дэлтэй Цэнхэр" МСУХ. Т.Наранхүү