Аймгийн Алдарт уяач Д.Бямбасүрэн: Ц.Даваасүрэн гишүүнд өгсөн хоёр адуу хоёулаа улсын наадамд айрагдсан

Сүхбаатар аймгийн Дарьганга сумын уугуул, аймгийн Алдарт уяач Д.Бямбасүрэнгийн ярилцлагыг хүргэж байна.

-Бямбасүрэн алдарт ямар удам угшилтай адуугаар наадаж Аймгийн алдарт цолд хүрэв ээ?
-Аавынхаа залуудаа цуглуулсан адуунуудаар уралдаж, 2009 онд аймгийн алдарт цол авсан. Одоо 120-иод адуутай байна. Манай аав Дугарсүрэн багш мэргэжилтэй, алба ажилтай байсан болохоор морь хар уях боломж нөхцөл тааруухан байсан. Гэхдээ 1986 онд сумынхаа наадамд шүдлэн үрээ түрүүлгэж байсан, мөн хязаалан адуу таваар оруулж, өвлийн уралдаанд ганц нэг адуу айрагдуулж байсан. Манай адууны гол цөм угшил Дарьгангын тожин адуу. Дээр нь Асгатын Батын Лхамсүрэнгийн хар азарга, Махбариадын улаан адуу гээд Сүхбаатар аймгийн хурдалж байгаа удамт адуунуудаар цус сэлбэсэн. Ер нь Дарьгангын хурдан адууны л нэг хэсэг, нутгийн олон буурал уяачдын удам дамжиж ирсэн хурдууд.
-Хаанахын ямар уралдаан наадамд од хийморьтой наадав?
-Хонгор азарга сумынхаа наадамд 5 уралдсанаас 3 түрүүлж 2 аман хүзүүдсэн. Хонгор азарга Дарьгангын Гонгорын зээрд азарганы төл байгаа юм. 2005 онд сумын 80 жилээр хээр шүдлэн гуравт давхиж, хүрэн халзан даага аман хүзүүдэж, алаг даага гуравт хурдалж, будан хязаалан аман хүзүүдэж,  нийт 4 айраг авсан. 2008 оны сумынхаа наадмын эхний өдөр хонгор азарга, их насны шаргал морь, халтар даага түрүүлгэж, 3 насны түрүү авч их сайхан наадаж байлаа. Мөн манай сумын Чүлтэмийн Чулуунбаатарын адууны удамтай халтар даага 2008 онд Алтан овооны тахилга наадамд дөрвөөр орсон.  Нийтдээ аймаг, сум, жижиг уралдааны 40-өөд айраг, түрүү бий.
-Үүнээс аймаг, бүсийн чанартай уралдааны айраг түрүү нь хэд вэ?
-Түрүүн ярьсан Алтан овооны наадамд халтар даага айрагдуулсан. Мөн найз Өлзийбаатарынхаа хүрэн үрээг аймагт аман хүзүүдүүлж, Дорноговь аймгийн наадамд таваар оруулж байсан.
-Тэгвэл унаган адуунаас чинь улсад гарч уралдаж байгаа адуу байна уу?
-Сумын наадамд зургаагаар орж байсан тожин ногоон соёолонг  2002 онд УИХ-ын гишүүн Ц.Даваасүрэн авч, 2003 оны улсын наадамд хавчиг азарга аман хүзүүдсэн. Тэр жилээ Даваасүрэн гишүүн дахиж ирээд их насны хар морь авч,  2004 оны улсын баяр наадамд дөрвөөр орсон.

А.Мөнх /"Тод магнай" сэтгүүл. Дугаарс 07/42/. 2013 он/