“Ширээгийн гол”МСУХ-ны тэргүүн С.Ганзориг: Аймгийнхаа баяр наадамд манай сумын уяачид одтой наадсаар ирсэн

Завхан аймгийн Цагаанхайрхан сумын МСУХ-ны талаар тэргүүн С.Ганзоригоос тодрууллаа.

-“Ширээгийн гол” МСУХ-ны талаар манай уншигчдад танилцуулаач?
-Юуны өмнө Монгол орны өнцөг булан бүрт буй уяачдыг уулзуулж, хурдан хүлгүүдийг танилцуулж байдаг “Тод магнай” сэтгүүлийн хамт олондоо талархснаа илэрхийлье. Аймаг аймгийн уяачид хурдан морьдыг танилцуулдаг дугараа энэ удаа манай аймагт таарч байгаад их баяртай байна.
-Баярлалаа.
-Манай Цагаанхайрхан сум хэзээнээсээ хурдтай.Аймгийнхаа баяр наадамд манай сумын уяачид одтой наадсаар ирсэн.Түүнчлэн манай сумаас Монгол Улсын Манлай уяач хоёр төрөн гарсныг та бүхэн мэдэх байх.
-Ах дүү Манлайгууд мөн биз дээ?
-Тиймээ, Манлай уяач Даариймаагийн Чулуунбат, Жаргал нар бол манай сумын уугуул хүмүүс байгаа юм. Энэ дашрамд “Тод магнай” сэтгүүлээрээ дамжуулаад нутаг орныхоо нэрийг өндөрт өргөж явдаг ах дүү Манлайгуудадаа баярлаж явдгаа илэрхийлье. За ингээд холбооныхоо талаар яръя. Манай сумын МСУХ-ны анхны тэргүүнээр Бэгзсүрэн гэж хүн ажиллаж байлаа. Тэр хүн уяачдынхаа амжилтыг бүртгэлжүүлсэн. Түүний дараа Мөнхбаатар гэж малын эмч залуу тэргүүнээр ажиллаж байгаад өнгөрсөн хавар миний бие энэ албыг аваад байна. Би сумынхаа Засаг даргаар нэлээд хэдэн жил ажиллаж байгаа хүн. Тиймээс хүмүүсийнхээ аж байдлыг сайн мэднэ хэмээн намайг тэргүүнээр сонгосон байх.
-Холбооны тэргүүний албыг аваад ямар ямар ажил амжуулав?
-Ямар нэг ажлыг хийхэд хувь хүний дур сонирхол их нөлөөлдөг юм байна. Би хүүхэд байхдаа хурдан морь унадаг байлаа.Аав минь аймгийн Алдарт уяач цолтой олон сайхан хурдан буянгуудтай хүн. Ааваасаа сурч мэдсэн тэр бүхэн өнөөдөр энэ ажлыг хийхэд ихээхэн дөхөм болж байна. Сумын МСУХ-ны тэргүүний ажлыг авснаас хойш таван хүн сумын Алдарт  уяач цол хүртлээ.Эдгээр хүмүүс нь өмнө нь цол зэргийн болзлоо хангасан 40 гаруй жил морь уясан улс. Жишээлбэл удахгүй та бүхэнтэй уулзах Мэнд, Сахъяа нарын ахмад уяачид байгаа юм. Насаараа морь уяж, морин спортын хөгжилд өөрийн хувь нэмрээ оруулсан эдгээр хүмүүсээ зохих ёсоор урамшуулах нь зүйтэй хэмээн үзсэн хэрэг л дээ.
-ММСУХ ч гэсэн олон жил морь уясан ахмад уяачдаа дэмжих бодлого баримталдаг?
-Тэгэлгүй яахав. “Ширээгийн гол” МСУХ нь өнгөрөгч 2013 онд гурван  зорилт тавьж ажилласан. Үүнд: 
Нэгдүгээрт: сумынхаа адууны угшлыг сайжруулах үүднээс Сүхбаатар, Дорнод , Увс зэрэг аймгуудаас адуу авчирч цус сэлбэх. Хоёрдугаарт уяачдынхаа хөдөлмөрийг үнэлж шилдэг уяач шалгаруулдаг болох. Энэ зорилтын хүрээнд өнгөрч оны амжилтаар уяачдаа шалгаруулж Мягмаржав  маань шилдгээр шалгарсан. Гуравдугаарт хурдан морь унаач хүүхдийнхээ аюулгүй байдлын хангах тал дээр ихээхэн анхаарч, даатгалд бүрэн хамруулж хамгаалалтын хувцас хэрэгслээр хангах гэх мэт. Энэхүү зорилтуудадаа бид тодорхой хэмжээнд хүрч ажилласан гэж хэлж болно.
-Ингэхэд танай сумын хэмжээнд морь уядаг хичнээн хүн байна. Тэдгээрийн дундаж нас нь хэд орчим байна вэ?
-Бид 2013 оны 3 сард шинээр зохион байгуулалтанд орж, албан ёсны бичиг баримттай болсон. Манай уяачдын холбоо 60 гаруй гишүүнтэй, 25 тэргүүлэгчтэй. Холбооны зөвлөх уяачаар Мэнд , Сүхбат, Ядамсүрэн нар ажилладаг. Түүнчлэн дөрвөн баг тус бүр зөвлөх уяачтай. Сүүлийн үед залуучууд маань хурдан морь их сонирхон уяж байна. Нүүдэлчин ахуй уламжлал ёс заншлаа дээдэлдэг болж төлөвшихөд морь ихээхэн нөлөөтэй учраас бид аль болох залуусаа дэмжиж ажилладаг. Залуучууд маань зүүн зүгээс адуу авч цусаа сэлбэх зэрэг ажлыг сайн хийж байгаа.
-Цагаанхайрхан сум харьцангуй аймагтайгаа ойр учраас уяачдад тань амжилтаа ахиулах боломж  нээлттэй байдаг байх?
-Тийм шүү.Манайхан аймгийн наадамд очоод маш сайн уралддаг. Жишээлбэл Бадарчийн цавьдар морь хоёр очоод хоёр түрүүллээ. Яриад байвал олон л доо.
-Ажилд тань амжилт хүсье. Ярилцсанд баярлалаа.

Ц.Амарбаяр