"Дэлтэй Цэнхэр" МСУХ-ны V бага хурал боллоо

Тавдугаар сарын 30, 31 ний өдрүүдэд Хөвсгөл аймгийн Мөрөн хотноо "Дэлтэй Цэнхэр" МСУХ-ны ээлжит 5-р бага хурал боллоо. Хурал зөвөлгөөнд Хөвсгөл аймгийн  23 сум тус бүрээс таван төлөөлөгч, хүн ам олонтой Мөрөн сумаас 10 төлөөлөгч оролцсон бөгөөд  хурлыг холбооны дэд тэргүүн аймгийн Алдарт уяач С.Гүншир нээж, Бүрэнтогтох сумын Засаг дарга Намуунцэцэг удирдан, нарийн бичгийн даргаар Их-Уул сумын "Их-уулын хүлэг" МСУХ-ны тэргүүн, сумын Засаг дарга Мянганбаяр нар ажиллалаа.
Хуралдааны эхэнд "Дэлтэй цэнхэр" МСУХ-ны нарийн бичгийн дарга, аймгийн ИТХ-ын дарга Т.Болдбаатар 2010-2014 онд хийгдсэн ажлынхаа тайланг,  Бүрэнтогтох сумын ИТХ-ын дарга Н.Өлзийцогт Хяналтын Зөвлөлийн мэдээллийг танилцуулан дээрх мэдээлэлтэй холбоотой  уяачдын санаа бодлыг сонслоо. Мөн энэ үеэр "Дэлтэй Цэнхэр" МСУХ-ны шилдэг салбар холбоо Тариалан сумын МСУХ-ны тэргүүн Б.Гантулга холбооныхоо ажлын туршлага, амжилтын талаар, Манлай хүлэгч Ш.Пүрэвхүү морин спортын хөгжлийн чиг хандлагын талаар сонирхолтой мэдээллийг хуваалцсан юм.
Хуралдааны үеэр МУ-ын Алдарт уяач Д.Зоригт, Цагаан-Уул сумын харьяат аймгийн Алдарт уяач П.Батчулуун, Ханх сумын харьяат уяач Даваадорж  нарт “Хөдөө аж ахуйн тэргүүний ажилтан” цол тэмдэг, Мөрөн сумын уяач Х.Гэрэлчулуунд “Ардын “Боловсролын тэргүүний ажилтан” цол тэмдэг гардуулж, хүндэтгэл үзүүллээ.
Бага хурал зөвлөгөөнд тус холбооны урилгаар ММСУХ-ны зөвлөх, түүхийн ухааны  доктор А.Баярмагнай оролцож ММСУХ-ны 6-р их хурлын шийдвэр, дүрэм, журмын шинэчлэл зэрэг асуудлаар  мэдээлэл хийсэн бол Дундговь аймгийн Луус сумын уугуул МУ-ын Манлай уяач Д.Эрдэнэчулуун хурдан морь уях, сойх эрдэм мэдлэг туршлагынхаа талаар зөвлөгөө өгч уяачдын сонирхсон асуултанд хариуллаа.
Хурал, зөвлөгөөний хоёр дахь өдөр холбооны тэргүүн, УИХ-ын гишүүн, төсвийн байнгын хорооны дарга Ц.Даваасүрэн холбооны бодлого, шийдвэрийн талаар илтгэл тавьж,  уяачдынхаа асуултанд хариулсан  юм. Түүнчлэн үдээс хойшхи хуралдаанаар  холбооны бүтэц зохион байгуулалтын асуудлыг хэлэлцэн Тэргүүнээр Ц.Даваасүрэнг дахин сонгож, 35  тэргүүлэгчидтэй байхаар тогтсон. Тэргүүлэгчдийн бүрэлдэхүүнд сум бүрийн төлөөлөл нэг гишүүн байхаас гадна  Т.Болдбаатар, С.Гүншир, Л.Ганбат, П.Отгон-Очир, М.Бат-Очир, М.Хуягбаатар, Б.Галбадрах, Батбаяр, Ч.Ванчинбазар нарын морины зүтгэлтнүүдийг удирдлагын багт байлгахаар батламжиллаа. Харин сумдаа төлөөлөх тэргүүлэгчдээ тухайн сумын МСУХ-ны  хурлаар хэлэлцүүлэн шийдвэрлэж нэрийг нь дэвшүүлэхээр тогтсон юм. .
Хурал зөвлөгөөний арга хэмжээ оройн зоог, дурсгалын зураг авалтаар өндөрлөлөө.

"Дэлтэй цэнхэр" МСУХ-ны ажлын алба Т.Наранхүү