"Хан-Уулын тахилга-2014" уралдаан боллоо

 Дорнод нутгийн зон олны шүтээн Баянтүмэн Хан-Уулын тахилга билгийн тооллын зуны тэргүүн сарын шинийн 3-ны билэгт сайн өдөр буюу 05 сарын 31-нд боллоо. Энэ удаагийн тахилга  аймгийн МСУХ-ны хурдан морины уралдаантай давхцснаараа онцлог мөн өргөн дэлгэр сайхан наадам болсон юм. Тус уралдаанд их нас, соёолон, хязаалан насны морьд уралдаж хөрш зэргэлдээ Сүхбаатар , Хэнтий зэрэг аймгийн уяачид морьдоо уяж ирцгээсэн байлаа.  
       Аймгийн МСУХ-ны нэрэмжит энэ удаагийн уралдааны их насны морийг  УИХ-ын гишүүн, аймгийн МСУХ-ны тэргүүн Х.Болорчулуун, харин соёолонг  “БД” ХХК-ийн захирал А.Хүрэлбаатар, аймгийн Алдарт уяач Б.Бэххуяг, “Цацраг трейд “ ХХК-ийн захирал Ж.Бат-Орших,аймгийн Алдарт уяач  Э.Доржрагчаа , аймгийн Алдарт уяач С.Ганбаатар нарын аймгийн МСУХ-ны тэргүүлэгчид байлсан. Харин хязаалангийн түрүүг "Ганоктэадр" ХХК-ийн захирал Сэлэнгэсайханы Ган-Эрдэнэ мотоциклоор мялааж, /С.Ган-Эрдэнийн дүү С.Галтын Жонон хар азарга аймгийн МСУХ-ны   ойн наадамд түрүүлж байсныг Дорнодчууд та бүхэн сайн мэдэх билээ/аман хүзүүнээс  30 хүртэлх морьдыг 2014 онд аймгийн Алдарт уяач цол  хүртсэн Цагаа-Овоо сумын харьяат Ц.Цэрэнтогтох, Чойбалсан сумын харьяат Х.Цэрэндорж, Д.Цэрэндорж, Баян-Уул сумын харьяат Д.Нямдорж, Баянтүмэн сумын харьяат  Ж.Отгонбаатар, Хэрлэн сумын харьяат Э.Доржрагчаа, Халхгол сумын харьяат Ц.Энхжаргал нар тус бүр 200 мянган төгрөг гарган байлсан байна. Ингээд түрүүлж айрагдсан морьдоо танилцуулъя.
Их нас -92
1.Хэрлэн сумын харьяат Баяндүүрэнгийн Мөнх-Одын Ембүү хул. Хул морийг  13 настай Б.Баянбаатар хүү унаж хурдлуулсан бөгөөд аймгийн Алдарт уяач С.Алтангэрэлийн унаган адуу юм.

2.Баяндун сумын харьяат  Нямсүрэнгийн Булгантамирын хүрэн. Булгантамир уяач өөрийн унаган хүлгээ  соёолонгоос нь хойш хойд талын сумдын бага уралдаануудад байнга түрүүлгэж айрагдуулж буй. Энэ удаа хүрэн морийг 13 настай  Н.Баттамир унаж хурдлуулжээ.
3.Хэрлэн сумын харьяат Адьяагийн Гантулгын бор морь. Бор морь аймгийн Алдарт уяач Адьяагийн /авынх нь /унаган адуу бөгөөд  буурал уяач Халхгол сумаас  ирж аймгийнхаа наадамд олон жил сайхан уралдаж буй юм. Бор морийг 10 настай Занданхүүгийн Пүрэвдаш  хүү унаж хурдлуулжээ.
4.Сүхбаатар аймгийн Баруун-Урт сумын харьяат, аймгийн Алдарт уяач С.Гомбосүрэнгийн хүрэн. Нутагтаа  "Түргэний" Гоомоо гэж алдаршсан энэ уяач  Дорнод аймгийн баяр наадамд олон удаа ирж уралдан түрүү, айраг хүртэж буй юм. Хүрэн морийг 9 настай  Г.Сүхбат хүү унаж хурдлуулжээ. 
5.МУ-ын шилдэг салбар холбоогоор шалгарч байсан  Халхгол сумын “Халхын Тован ” МСУХ-ны тэргүүлэгч аймгийн Алдарт уяач Цэдэнжавын Энхжаргалын бор. 14 настай Б.Батбаяр хүүгийн унаж хурдлуулсан бор эзнийхээ шинэхэн Алдарт цолыг ийнхүү айргаар мялаалаа.
Соёолон-87
1.Матад сумын харьяат, аймгийн Алдарт уяач Чулууны Тогоохүү буюу олноо Жамбага хэмээх алдаршсан залуухан Алдартын унаган халиун алаг үрээ түрүү магнайд хурдаллаа. Шинэхэн Алдартын ээж Дүгэрийн Цэрэндорж  Монголын хуруу дарам цөөн эмэгтэй уяачдын нэг бөгөөд олон жил аймгийнхаа баяр наадамд их морь голдуу түрүүлгэж айрагдуулж явсан аймгийн Алдарт уяач юм. Түүнчлэн төрийнхөө их баяр наадамд гурван жил дараалан түрүүлээд буй Улс халзан азаргыг Тогоохүүгийн хүү Баярхүү унаж хурдлуулдагийг хурдан морь сонирхогч түмэн мэдэх бизээ.
2.Хөлөнбуйр сумын харьяа, сумын Алдарт уяач Юмсүрэнгийн Эрдэнээгийн хээр. Хээр үрээг Эрдэнээ Хэрлэн сумын 5 –р багийн Засаг дарга найз Арсланбаатараасаа авсан гэдэг. Энэ өдөр  14 настай Б.Галбадрах хүү хээр үрээг унаж ийнхүү аман хүзүүнд хурдлууллаа
3.Хэрлэн сумын харьяат Ц.Анхбаярын хүрэн. Хүрэн үрээ аймгийн Алдарт уяач  Ц.Эрдэнэцогтын унаган адуу бөгөөд  эцэг Даншиг хүрэн азарга нь аймгийн МСУХ-ны 15 жилийн ойн баярт  айрагдаж байсан юм.Энэ өдөр хүрэн үрээг 14 настай уралдаанч хүү  Хүрэлбаатар унаж хурдлуулжээ.
4.Хэрлэн сумын харьяат, аймгийн Алдарт уяач Цэрэнжавын Эрдэнэцогтын хээр. Дорнодынхон  Эрдэнэцогтыг Дархан хүрэн морь, Даншиг хүрэн азаргаар нь андахгүй. Тэрээр Сүхбаатар аймгийн Асгат сумын  80 жилийн ойд хоёр шүдлэнгээ нэгийг нь түрүүлгэж, нөгөөг нь аман хүзүүдүүлж байсан хийморьтой нэгэн билээ. 2013 оны аймгийн Шилдэг уяач шагналыг их морь, хязаалан /хоёр ч хязаалан айрагдуулсан/ айрагдуулж, даага түрүүлгэсэн амжилтаараа  хүртэж байсан юм. Хээр үрээг энэ өдөр  М.Ренчиндорж хүү унаж хурдлуулжээ.
5.Чойбалсан сумын харьяат Ж.Батхүүгийн харлаг. Харлаг үрээг  Чингүүлэн унаж хурдлуулсан бөгөөд энэ хавар нэг аман хүзүүдсэн юм.
Хязаалан-76

1.Халхгол сумын харьяат аймгийн Алдарт уяач Цэдэнжавын Энхжаргалын хээр. Хээр үрээг 14 настай  Б.Батбаяр хүү унаж хурдлуулжээ.
2.Матад сумын харьяат Дамдиндоржийн Пүрэвсүрэнгийн хүрэн. Хүрэн үрээг уралдаанч хүү Тогоохүүгийн Баярхүү унаж хурдлуулсан байна.
3.Булган сумын харьяат Ч.Эрдэнэбаярын бор
4.Цагаан-Овоо сумын харьяат Ж.Түвдэндоржийн хүрэн. Хүрэн үрээг 12 настай уралдаанч хүү Б.Батсүх унаж хурдлуулсан байна. 
5.Чойбалсан сумын харьяат Дашийн Батгэрэлийн зээрд. Тэрээр аймгийн Алдарт уяач Даш агсны хүү гэдгийг Дорнодчууд мэдэх бизээ. Даш агсны их насны хүрэн морь 2011 онд Дорнод аймгийн 80 жилийн баяр наадамд аман хүзүүдэж байсан ба аавынхаа морь уях эрдмийг өвлөж хүү Батмөнх, Батгэрэл, Жаргалсайхан нар нь өдгөө хүлэг морьдоо сайн уяж байна. Зээрд үрээг Ш.Төрбаяжих хүү унаж хурдлуулжээ.

 Эцэст нь энэхүү уралдааныг зохион байгуулахад хамтарч ажилласан хурандаа Н.Гантөмөр даргатай Онцгой байдлын хэлтэс, хурандаа Т.Оюунбаатар даргатай аймгийн Цагдаагийн газар, А.Нансалмаа даргатай Хүүхэд, гэр бүлийн хөгжлийн хэлтэс, Д.Должин даргатай Зүүн бүсийн оношлогоо эмчилгээний төвийн хамт олон болон А.Энхтүвшин даргатай ХХАА-н газрын мэргэжилтэн эмч нартаа талархаж байгаагаа илэрхийлье.

Дорнод аймгийн МСУХ-ны нарийн бичгийн дарга Т.Батсайхан, Гэрэл зургийг Балдандовжид