Залуу уяач Д.Энхбат: Шарга азарга маань анхны айргийг авчирсан

Мөнххаан хайрхандаа сүсэглэн, дээдсийнхээ буян заяаг дээдлэгч залуу уяачийн бичил ярилцлагыг уншигч танаа хүргэж байна. Энэ хүн бол Сүхбаатар аймгийн Мөнххаан сумын уугуул Дамдинсүрэнгийн Энхбат юм.
-Хурдан хүлгийн хийморьт сүсэглэсэн залуу уяачийн алдар хэнсэн билээ. Манай уншигчдад өөрийгөө танилцуулахгүй юу?
-За намайг Дамдинсүрэнгийн Энхбат гэдэг. Миний аав Балдандагвын Дамдинсүрэн гэгч багш мэргэжилтэй хоёр хурдан ембүү азаргатай хүн байсан. Азарганууд нь Мөнххааны наадамд олон түрүүлж, айрагдаж байсан гэдэг. Ер нь азарганы түрүү олон авсан хүн.
-Уяач аавын удмыг залгасан хүү байх нь ээ?
-Тиймээ. Аавынхаа уясан морьдыг унаж хурдлуулдаг байсан. Хүүхэд ахуйгаасаа л моринд дуртай болж, өнөөдрийг хүртэл адуу гэдэг амьтнаас холдсонгүй дээ.
-Аавын тань нэртэй ямар, ямар хурдан хүлгэд байв?
-Аав  маань уг нь Халзан сумын хүн. 1960-аад оны дунд үеэс Бүрэнцогтод ажиллах болж, тэр цагаас энд суурьшсан юм билээ. Тэр утгаараа манай адууны суурь Халзан сумынх. Манайх хүрэн халзан, хонгор халзан голдуу адуутай айл байсан.Тэр үед бага байсан болохоор яг ямар удам угшилтай адуутай байсныг сайн мэдэхгүй юм. Одоо бол Махбуриадын улаан, Банзайн буган, Босоо цавьдар зэрэг нэртэй угшлуудаас цуглуулсаан.
-Энхбат хэдий үеэс эхлэн бие даан морь уях болсон юм бэ?
-1995-96 оноос эхлээд бие дааж морь уяж, 2000-аад оны дунд үеэс эхлэн сумынхаа наадамд ганц нэг адуу оруулж эхэлсэн. 2006 оны наадамд шарга азаргаа таваар давхиулж, тэр жилээ Бүрэнцогтын суварганы наадамд түрүүлгэсэн. Түүнээс хойш энд тэндхийн наадмуудад морьдынхоо тоосыг өргүүлэн, хүүхэд, морь мэнд сайхан наадаад л явж байна.
-Хамгийн том довон дээр наадсан нь хэзээ вэ?
-2011 онд Ардын хувьсгалын 90 жилийн ойгоор төрийнхөө наадамд очиж, аавынхаа тамгатай унаган даагаа 60-аадаар давхиулсан.
-Адуу малын наймаа хийж байна уу?
-Ганц нэг адуу хойшоо зарсан. Тэглээ, ингэлээ гэж дуулдахгүй л байна.
-Уг нь их сайхан адуутай айл юмаа?
-Гайгүй сайн гэсэн удам угшлаас бүгдээс нь авсан. Уяачийн хөдөлмөр гэдэг дадлага туршлага ихээхэн шаарддаг юм чинь яваандаа болох байлгүй дээ.
-Тэгэлгүй яахав. Дээдсийнхээ буян заяаг үргэлжлүүлэн хурдан хүлгийн хийморьт сүсэглэн яваа таны цаашдын ажил үйлсэд амжилт хүсье.
У.Энхмаа