Архангай аймгийн Өгийнуур суманд болсон хаврын бүсийн уралдаан

Архангай аймгийн хэмжээнд Засаг даргын захирамжаар хаврын тэргүүн сарын гурван уралдаан, Үндэсний баяр наадам зохион байгуулагддаг. Модон морин жил гарсаар хаврын тэргүүн сарын шинийн 8-нд Өгийнуур суманд, хаврын тэргүүн сарын шинийн 10-нд Эрдэнэбулган суманд, хаврын тэргүүн сарын шинийн 15-нд Өлзийт суманд тус тус азарга, их нас, соёолон насны морьдын уралдаан боллоо. Энэ гурван уралдаанд азарга 243, их нас 328, соёолон 221, нийтдээ 792 хурдан морь, 695 унаач хүүхэд оролцсон бөгөөд  унаач хүүхэд, хурдан морь бэртэж гэмтсэн, эрсэдсэн тохиолдол гараагүй өндөр зохион байгуулалттай болж өндөрлөсөн. Өөрөөр хэлбэл, аймгийн МСУХ-ны 2014.01.26-ны тэргүүлэгчдийн хурлаар тогтсон журмын дагуу уралдааны замд гарч байгаа морьдыг машин дагуулахгүй байх, дагасан  тохиолдолд төхөөрөмжөөс 5 км-ын наана зогсоох, хурдан морьдын уралдааны зам, уралдаж байгаа морьдоос 500 метр зайтай явах, гарааны зурхай руу аймгийн ЭМГ-ын тусламжийн тэрэг, мал эмнэлэг, манлайлагч тугтай машин, МСУХ-ны тугтай машин гэсэн дөрвөн машин явсан, барианы зурхайг олс татаж зайтай байрлуулсан, цагдаагийн газраас бүрэлдэхүүн ажиллаж хэв журмыг сахиулсан, мөн гарааны төхөөрөмжийг Онцгой байдлын хэлтэс хариуцаж ажилласан, унаач хүүхдийн хувцас хэрэгсэлд Хүүхэд гэр бүл хөгжлийн хэлтсийн мэргэжилтнүүд хяналт тавьж ажилласан нь эрсдэлгүй уралдаан болоход нөлөөлсөн гэж үзэж байгаа юм.
Хаврын тэргүүн сарын шинийн найманд Өгийнуур суманд болсон хурдан морины бүсийн уралдааны цуваа:
Азарга:
1. Хотонт сумын уяач  Эрдэнэбаярын хээр
2. Төв аймгийн Заамар сумын уяач Лхагвагийн сартай хонгор
3. Эрдэнэбулган сумын уяач  Алтанзулын хээр
4. Хотонт сумын уяач  Түмэнжаргалын хээр халзан
5. Цэнхэр сумын уяач Дамдинсүрэнгийн хээр халзан
Их нас:
1. Өгийнуур сумын уяач Мягмаржанцангийн сартай хээр
2. Хайрхан сумын уяач Болдбаатарын хүрэн халзан
3. Хотонт сумын уяач Энхтүвшингийн бөмбөн хүрэн
4. Булган аймгийн Гурванбулаг сумын уяач Түвшинтөгсийн хар
5. Хайрхан сумын уяач Болдбаатарын хүрэн
Соёолон:
1. Хайрхан сумын уяач Болдбаатарын хүрэн
2. Өгийнуур сумын уяач  Баясгалангийн хонгор
3. Өгийнуур сумын уяач  Алтангэрэлийн хүрэн
4. Өгийнуур сумын уяач  Баясгалангийн буган халиун
5. Хотонт сумын уяач  Амарсанаагийн зээрд тус тус хурдалсан байна.

Архангай аймгийн МСУХ-ны нарийн бичгийн дарга Д.Отгонбат