Галтын залуус үзүүрт үлдлээ

Хөвсгөл аймгийн Рашаант сумын Улаанбаатар хот дахь нутгийн зөвлөлийн тэргүүлэгч, “Эрчим Булнай” ХХК-ий ерөнхий захирал, Нацагдоржийн Нямдаваагийн ивээн тэтгэлгээр Хөвсгөл аймгийн Түнэл сумын харьяат, Монгол улсын хүчит арслан Өлзийтийн Чүлтэмсүрэнгийн нэрэмжит аймаг цэргийн цолтой болон залуу бөхчүүдийн барилдааныг “Хөвсгөлийн хүчтэн” дэвжээнээс санаачлан зохион байгууллаа.
Барилдааныг нээлттэй байдлаар явуулсан бөгөөд Өвөрхангай аймгийн арслан Д.Цэвэлсодном, Хөвсгөл аймгийн арслан Ч.Батчулуун, Завхан аймгийн арслан Ш.Пүрэвгарьд нараар манлайлуулсан хүчит 64 бөх зодоглон барилдлаа.
Бөхийн барилдааны нэгийн даваанд а.х Б.Төмөрбаатар с.х Гэрэлцогтыг хийг нь тааруулж дугтраад, а.н Б.Пүрэвдорж с.з Г.Ганбатыг хагалж өшиглөөд, а.н Б.Даваа-Очир с.з Э.Батбуянг зайлж дугтраад,  сумын начин Ө.Ган-Эрдэнэ а.х Т.Бэгзсүрэнг дагуулж хөмрөөд, Цагаан-Үүр сумын заан Г.Өнөрбат а.н.н Н.Жаргалбатыг дагуулж сунгаж татаад, Их-Уул сумын заан Э.Өлзийсайхан а.н Ч.Мөнхтогтохыг татаж хавирахад дагуулж тахимдаад, Түнэл сумын заан Г.Цогтбаатар Жаргалант сумын заан Н.Мөнх-Эрдэнийг зүүн хутгаад, Бүрэнтогтох сумын заан Г.Балжинням Завхан аймгийн Отгон сумын заан Т.Дүгэрдоржийг гар дунгуйгаар тус тус орхилоо.
Хоёрын даваанд а.а Ш.Пүрэвгарьд с.з Э.Өлзийсайхан нар оноолт таарч үзэгчдийг багагүй шуугиулсан бөгөөд а.а аргагүй илүүрхэж дайрч мордоод орхисон бол а.а Ч.Батчулуун с.з Г.Өнөрбатыг хавсарчихав. Мөн а.н Ц.Сандагдорж с.з Х.Дарамзагдыг давхар тохоход сөрж бярдаж мушгиад, а.н А.Хосбаяр с.з Ц.Цэнд-Аюушыг тахимдаж дайраад, с.з Т.Хайдавдорж с.з Б.Чимэдвандангийн хөлд орж дэрлээд ту с тус давлаа.
Гурвын даваанд а.х Б.Төрмагнай а.а Д.Цэвэлсодномыг хонгодоод, ц.з Э.Тулга с.з Г.Балжиннямыг барьц сонгож хөнтрөөд, а.н Б.Пүрэвдорж а.н А.Хосбаярыг түрж хөөхөд дагуулж мушгиад, а.а Ш.Пүрэвгарьд а.х Б.Төмөрбаатарыг сунгаж татаад, а.н Б.Даваа-Очир а.н Ц.Сандагдоржийг зайлж татаад давснаар дөрвийн даваанд барилдах эрхтэй болов. Мөн а.х Б.Бат-Өлзий с.з Т.Хайдавдорж нарын барилдаанд с.з давсан боловч элэг бүс тайлагдсан гэсэн шалтгаанаар ахин барилдаж шороодов. Үнэндээ Хайдавдоржийг даваад дэвэхэд элэг бүс тайлагдсан юм.
Дөрвийн даваанд а.н Б.Пүрэвдорж а.а Ш.Пүрэвгарьдыг зоримог хонгодоод, а.х Б.Төрмагнай а.з Б.Шаравнямбуугийн ард гараад, а.х Б.Бат-Өлзий ц.з Э.Тулгыг дагуулж сунгаж татаад, а.а Ч.Батчулуун а.н Б.Даваа-Очирыг мушгиад давав.
Тавын даваанд а.а Ч.Батчулуун а.х Б.Төрмагнайг суйлаад давсан бол а.н Б.Пүрэвдорж а.х Б.Бат-Өлзийг баруун талдаа тун даацтай суйлаад тэр чигт нь түрж хөөгөөд давснаар энэ өдөр тун их бяртай байгаагаа нотоллоо. Түүний хувьд а.н А.Хосбаяр, а.а Ш.Пүрэвгарьд, а.х Б.Бат-Өлзий нарын шилдгүүдийг дараалуулан даацтай мэхээр шороодууллаа.
Үзүүрт үлдсэн Галтын хоёрын барилдаан дан шуудагнаас шийдэгдэж арслан түрж хөөгөөд давснаар нутгийн арслангийн барилдаанд түрүү бөхөөр тодорлоо.
Оноолтыг гурвын даваанаас үзнэ үү.
Гурвын даваа
1. Д.Цэвэлсодном а.а – Б.Төрмагнай а.х
2. Ч.Батчулуун а.а – Б.Даваадорж а.н.н
3. Ш.Пүрэвгарьд а.а – Б.Төмөрбаатар а.х
4. Б.Шаравнямбуу а.з – Э.Ширнэн с.з
5. Э.Тулга ц.з – Г.Балжинням с.з
6. Б.Бат-Өлзий а.х – Т.Хайдавдорж с.з
7. Б.Пүрэвдорж а.н – А.Хосбаяр а.н
8. Б.Даваа-Очир а.н – Ц.Сандагдорж а.н
Дөрвийн даваа
1. Ч.Батчулуун а.а – Б.Даваа-Очир а.н
2. Ш.Пүрэвгарьд а.а – Б.Пүрэвдорж а.н
3. Б.Шаравнямбуу а.з – Б.Төрмагнай а.х
4. Э.Тулга ц.з – Б.Бат-Өлзий а.х
Тавын даваа
1. Ч.Батчулуун а.а – Б.Төрмагнай а.х
2. Б.Бат-Өлзий а.х – Б.Пүрэвдорж а.н
Зургаагийн даваа
1. Ч.Батчулуун а.а – Б.Пүрэвдорж а.н
МУИС-ийн оюутан Т.Түмэндэмбэрэл