АХ-ын 14 жилийн ойн баяр наадам

1935 он. Энэ жилийн баяр наадамд 720 бөх зодоглосноос Л.Чимэд заан 10 давж түрүүлэн улсын арслан, ес давж үзүүрлэсэн аймгийн арслан Ш.Гомбосүрэн улсын заан цол хүртжээ.
Хурдан морины уралдааны азарганд Н.Пад /Төв.Авдарбаян/-ийн их хүрэн, их насанд Г.Очир /Төв.Авдарбаян/-ын буурал хээр, соёолонд Гомбожав /Төв.Баян/ын улаан, хязааланд Төмөрчөдөр /Төв.Баянцагаан/-ийн улаан бор, шүдлэнд Дагмид-Очир /Хэнтий.галшар/-ын цавьдар, дааганд Доёд /Төв.Эрдэнэ/-ын халтар хээр түрүү магнай болжээ.
Үндэсний сурын харваа:
1. н.Содномдаржаа /Хэнтий/-20
2. Н.Чагдарсүрэн /Хэнтий/-20
3. н.Намхай /Дорнод/
4. Ш.Ишчогдов /Төв.Дэлгэрхаан/
5. Ш.Бадамцэвээн /Төв/
1935 онд буюу АХ-ын 14 жилийн ойн Улсын их баяр наадмын сурын харваанд түрүүлсэн Хэнтий аймгийн Биндэр сумын уугуул, улсын мэргэн Содномдаржаагийн жинхэнэ нэрийг Лувсанцэрэн гэдэг байсан бөгөөд лам хуварга нэгэн байсан аж. Тийм болоод ч тэр үү, Содномдаржаа хэмээх нэрээр оролцон ийнхүү 20 онож цэц магнайлсан гэлцэх нь ч бий. Юутай ч түүний Улсын наадмын харваанд 20 сумд 20 оносон амжилт нь 1960 он хүртэл эвдэгдээгүй байсаар ирсэн нь харваачдын оноо данснаас илэрхий байдаг билээ.
Анианханы Хүрэл-Алагийн Отгонбаяр