Аймгийн Алдарт уяач Ч.Пүрэв: Бүсийн наадмаас хоёр дахь айргаа хүртлээ

Морин жилийн өнгө тольдох “Дүнжингаравын хурд-2014” хаврын бүсийн уралдаанд халтар азаргаа айргийн дөрвөөр хурдлуулсан Төв аймгийн Жаргалант сумын уугуул, аймгийн Алдарт уяач Чойбудраагийн Пүрэвтэй цөөн хором хөөрөлдөн, баярын сэтгэгдлийг нь хуваалцлаа.
-Азаргаа айрагдуулан морин жилийн од хийморио тольдсон танд баяр хүргэе.
-Баярлалаа.Халтар азарга маань Жаргалант угшилтай адуу. Эцэг нь манай унаган адуу, эх нь Жаргалант угшилтай гүү байдаг юм. Өмнө нь “Нийслэлийн хурд” уралдаанд нэг удаа аман хүзүүдэж, аймгийн бүсийн уралдаануудад хэд хэдэн удаа айрагдаж байсан. Өнөөдөр Засгийн газрын тогтоолт “Дүнжингаравын хурд” уралдаандаа айргийн дөрөвт хурдаллаа. Сэтгэл өндөр баяртай байна.
-Уралдааны тов тодорхойгүй байсан нь уяачдад хүндрэлтэй байв уу?
-Тэгэлгүй яахав. Хэдэнд ямар уралдаан болохоос шалтгаалаад уяачид маань морьдондоо ажил хийдэг. Гэтэл “Дүнжингарав” хэзээ болох нь тодорхойгүй хойшлоод, дам төдий мэдээлэлтэй л байлаа. Сүүлд тов гарлаа гэж дуулаад, азаргандаа цөөн хэдэн хоногийн ажил хийгээд мордуулсан. Ер нь цаашид уралдаануудынхаа товыг эртнээс гаргаж, уяачдадаа иймэрхүүү хүндрэл учруулахгүй байвал сайн л байна.
-Өнөөдрийн уралдаанд хэдэн насны морьтой ирсэн бэ?
-Эрлийзээс бусад насанд мордуулнаа.
-Халтар азарганы амжилт Засгийн газрын тогтоолт төрийн хишигтэй наадмын анхны айраг уу? Үүнээс өмнө томоохон наадмуудад уясан хүлгээ түрүүлгэж айрагдуулж байв уу?
-1997 онд Эрдэнэтэд болсон хангайн бүсийн уралдаанд алаг даагаа аман хүзүүнд хурдлуулж байсан. Халтар азарганых бүсийн наадмын хоёр дахь айраг.
-Хэдэн онд аймгийн Алдарт уяач цолыг хүртсэн бэ?
-2013 онд Төв аймгийн 90 жилийн ойн өмнөхөн зургаан түрүү, 12 айргийн амжилтаар аймгийн Алдарт уяач цолоо хүртсэн.
-Шинэхэн Алдартын дараа дараагийн уралдаануудад амжилт хүсье. Ярилцсанд баярлалаа.
У.Энхмаа