Хүндэт мэргэний мялаалгын харваа

Эх орны зүүн хязгаарт Дорнод аймгийн төв Чойбалсан хотод дөрөвдүгээр сарын 26, 27-ны өдрүүдэд Монголын Үндэсний сурын холбооны Хүндэт мэргэн цол хүртсэн спортын мастер Гүржавын Ломбодоржийн цолны мялаалгын харваа амжилттай болж өндөрлөлөө. Энэ харваанд Улаанбаатар хот, Багануур дүүрэг, Баян-Уул, Баяндун, Дашбалбар зэрэг сумаас хүрэлцэн ирсэн гоц мэргэн Д.Борохин, хошой мэргэн Д.Нямсүрэн, Д.Эрдэнэтуяа, улсын мэргэн Х.Мөнхжаргал, Б.Дуламханд, хүндэт мэргэн Д.Рэнчинханд, спортын мастер Д.Цэрэндулам, Н.Нацагдорж нарын 70-аад харваач оролцсон буриад, халх сурын уухайн түрлэгээр газар тэнгэр, хангай дэлхийгээ баясуулан цэнгүүлэв.
Эхний өдөр явагдсан буриад сурын харваанд эрэгтэйчүүдээс спортын мастер Н.Өлзийбилэг /Багануур/ 64 сумаас 56 онож түрүүлэн, спортын мастер Г.Амарсайхан /Багануур/ 46, залуу харваач Б.Хүрэлбаатар /Улаанбаатар/ 45 онож хоёр, гуравдугаар байрт шалгарсан бол эмэгтэйчүүдээс спортын мастер Ч.Гандаваа /Дорнод/ 64 сумаас 38 онон магнайлж, 35 оноотой залуу харваач Тэргэлсаран /Дорнод/, 34 оноотой хошой мэргэн Д.Эрдэнэтуяа /Улаанбаатар/ нар удаалсан юм.
Дараачийн өдөр явагдсан халх сурын харваанд эрэгтэйчүүдээс спортын мастер О.Сүхбаатар /Дорнод/ 40 сумаас 36 онож түрүүлэн, хоёрдугаар байрт залуу харваач Батдорж /Дорнод/ орж, гуравдугаар байрын төлөө 27 оноотой спортын мастер Н.Өлзийбилэг, залуу харваач Хүрэлбаатар нар товхлон Өлзийбилэг товхоо авав. Эмэгтэйчүүдээс спортын мастер Ч.Гандаваа /Дорнод/ 40сумаас 33 оноогоор манлайлав. Удаах байрт 31 оноотой хошой мэргэн Эрдэнэтуяа /Улаанбаатар/, 23 оноотой спортын мастер Б.Пүрэв нар орсон байна.
Харвааны өмнөх өдөр тэнгэр хуйсагнан салхи шороотой байсан хэдий ч тэмцээний өдрүүдэд тогтуун сайхан байсан нь харваачдын сэтгэлийг тэнийлгэсэн. Энэ ялдамд Дорнод аймгийн сурын холбоог удирдан харваачдынхаа төлөө олон зүйл санаачлан бүтээн байгуулалтын их ажил өрнүүлж яваа Ш.Баттөмөртөө холоос очсон харваачдынхаа өмнөөс баярласан талархсанаа илэрхийлэн таны бодож сэдсэн, аймгийн сум бүхнийг сурын талбайтай болгох хүсэл мөрөөдөл тань биелэх болтугай гэж ерөөе.
МУ-ын мэргэн П.Гарамдорж