Шилдэг начингуудын шимтэй тулаан болно

МҮБХ, “Хамаг Монгол” студитэй хамтран “Начин цолтнуудын багийн халз барилдаан”-ыг тавдугаарсарын 3-ны өдөр зохион байгуулах гэж байна. Сүүлийн үеийн барилдаануудад оролцсон байдал болоод үзэгч түмний хүсэлтийн дагуу сонгогдсон 12 начин хоёр багт хуваагдан барилдана.
Нэг багийг улсын өсөх идэр начин Э.Энхбат ахлах бол нөгөө багийг Монгол Улсын начин Ч.Баянмөнх ахлан оролцох юм байна.
Зүүн жигүүрт:
1. Улсын өсөх идэр, өрнөн дэлгэрэх начин Эрдэнэбилэгийн Энхбат
2. Улсын начин Дугардоржийн Батбаяр
3. Улсын начин Баатарын Амарзаяа
4. Улсын начин Цэдэнбазарын Одбаяр
5. Улсын начин Рэнцэнбямбын Пүрэвдагва
6. Улсын начин Төрөөгийн Баасанхүү
Баруун жигүүрт:
1. Улсын начин Чотонгийн Баянмөнх
2. Улсын начин Батмөнхийн Сангисүрэн
3. Улсын начин Амарын Батмөнх
4. Улсын начин Жаргалсайханы Чулуунбат
5. Улсын начин Баатархүүгийн Пүрэвсайхан
6. Улсын начин Лувсандоржийн Цэрэнтогтох

Өнгөрсөн жил дөрөвдүгээр сарын 21-ий өдөр болж зүүн жигүүрээс:
1. у.ө.и.н Э.Энхбат
2. у.н Ду.Батбаяр
3. у.н Б.Батмөнх
4. у.н Б.Амарзаяа
5. у.н Ц.Одбаяр
6. у.н Р.Пүрэвдагва нар
Баруун жигүүрээс:
1. у.ө.и.н Ш.Жаргалсайхан
2. у.ө.и.н Б.Гончигдамба
3. Ч.Баянмөнх
4. у.н Б.Сангисүрэн
5. у.н А.Батмөнх
6. у.н Б.Пүрэвсайхан нар барилдаж зүүн жигүүрийн бөхчүүд 23 даваа авсан амжилтаар ялж байсан билээ.
Өнгөрсөн жилийн барилдаанд у.н Р.Пүрэвдагва уналгүй зургаан даваа авсан бол у.н Б.Пүрэвсайхан 5 даваа авч 2 удаа шороодож байлаа. Зургаан барилдаанд барилдсан атал юунд 5 давж 2 унасан гэж байгаагийн учрыг бөхөө шимтэн үздэг уншигчид маань сайн мэдэж байгаа болов уу. Гуравдугаар тойргийн барилдаанд у.ө.и.н Б.Гончигдамба гэмтэж түүний оронд багийнх нь гишүүд нөхөн барилдсан билээ. Хоёрдугаар тойрогт хоёр Пүрэв тааран барилдаж Пүрэвдагва давсан тул Пүрэвсайхан начин даагаа нэхэхийг хүсч хамгийн сүүлийн тойрогт Б.Гончигдамбын оронд Пүрэвдагватай барилдаж мөн шороодож өөрийн авсан 5 даваа, 1 унаан дээр ахин нэг унаа нэмсэн юм.
Энэ барилдаанд у.ө.и.н Э.Энхбатын у.н Б.Сангисүрэнг хавирсан, у.н Ц.Одбаярын у.ө.и.н Ш.Жаргалсайханыг таллаж тахимдсан, у.н Р.Пүрэвдагвын у.н Б.Пүрэвсайханыг дагуулж мурьсан, у.н Б.Сангисүрэнгийн у.ө.и.н Э.Энхбатыг голлож дайрсан, у.н Р.Пүрэвдагвын у.ө.и.н Ш.Жаргалсайханыг дунгуйлдаж татсан, мөн у.н Р.Пүрэвдагвын у.н Б.Сангисүрэнг сэжиж эргээд давсан зэрэг сонирхолтой сайхан барилдуунууд олноор гарч үзэгчдийг уулгалуулж байсан билээ. Тэгвэл өнөө жилийн энэ “тулаан”-д ямархуу болохыг, ямар барилдаан гарахыг 5 дугаар сарын 3-ы Бямба гарагт Монгол Бөхийн Өргөөнд очиж мэдэж болох юм .
МУИС-ийн оюутан Т.Түмэндэмбэрэл