Хурдан морь унаач О.Батболд: Морио амрааж байгаад явуулахаар сайн давхидаг юм

-“Дүнжингаравын хурд” уралдаандаа их морь айрагдуулсанд баяр хүргэе. Уралдаанч хүүгийн нэр хэн билээ?
-Миний нэрийг Отгонбаярын Батболд гэдэг. Энэ жил 11 настай. Гурав дахь жилдээ хурдан морь унаж байгаа. Өнөөдрийн уралдаанд их морь, соёолон унаж, хээр морио айргийн таваар хурдлуулаад их баяртай байна.
-Хэзээнээс Шинэбаатар уяачийн морийг унаж байгаа вэ?
-Угаасаа л Шинээ ахын морийг унадаг юм. Өөр хүний морь унаж байгаагүй ээ.
-Хурдан морь унах болсоор ямар амжилт үзүүлээд байгаа вэ?
-2012 оны улсын наадамд Од хээрээ айргийн таваар давхиулсан. Түүний дараа бас Луус суманд очиж тавлуулсан.
-Олон газрын наадамд оролцож байв уу?
-Дүнжингаравын хурдад гурав дахь жилдээ оролцож байна. Өнгөрсөн жил Дүнжингаравын дараа Эрдэнэтийн уралдаанд очиж уралдаад зургаагаар давхиулсан. Бас өнгөрсөн зун Өвөрхангайн  Арвайхээрийн наадамд явсан.
-Хурдан морь унах эрсдэлтэй гэдэг. Чамд тийм зүйл тохиолдож байсан уу?
-Эргэхдээ л шахалдах нь хэцүү. Түүнээс бусдаар гайгүй ээ. Морь унаад эрүүл агаарт явж байх сайхан ш дээ.
-Гэрийнхэн тань хориглож байсан удаа бий юу?
-Би Төв аймгийн Баян сумынх. Бид эцэг эхээс дөрвүүлээ. Агаа маань 11-р ангид сурдаг. Бас моринд дуртай. Би болохоор тавдугаар ангид сурдаг. Морь унах дуртай болохоороо сургуулиа дөнгөж амраагаад л хөдөө явдаг.
-Уралдааны үед ямар тактик барьж уралддаг вэ?
-Морио амрааж байгаад жаахан явуулдаг.Тэгэхээр морь маань сайн давхидаг  юм.
-Батболд унаачийнхаа хувьд гаргасан амжилтаа хэрхэн үнэлүүлдэг вэ?
-2011 онд спортын дэд мастер цол авсан ш дээ.
-Мундаг юмаа. Дараа дараагийн уралдаануудад чинь амжилт хүсье.
У.Энхмаа