Аймгийн Алдарт уяач Д.Эрболд: Говийнхон 3 түрүү, 4 айраг хүртлээ

Энэ сарын 13-нд зохион байгуулагдсан "Дүнжингаравын хурд-2014" хаврын бүсийн уралдааны соёолон насанд Өмнөговь аймгийн Цогтцэцийн сумын уугуул, аймгийн Алдарт уяач Д.Эрболдын Тэргүүн хонгор тод магнай, торгон жолоогоо өргүүлсэн. Маргааш нь зохион байгуулагдсан нийслэлийн тэргүүн магнай хүлэг шалгаруулах "Хангарьд-2014" уралдаанд түүний Амин хонгор үрээ аман хүзүүдлээ. Ингээд түүнтэй ярилцсанаа уншигч танаа толилуулж байна.
-"Дүнжингаравын хурд-2014" болон  "Хангарьд-2014" уралдаанд өмтэй сайхан наадсанд баяр хүргэе.
-"Дүнжингарав" уралдаандаа Өмнөговь аймгийн Цогтцэций сумаас хүрэлцэн ирж маш сайхан наадлаа. Азарга дундуур, их нас есөөр,  Тэргүүн хонгор түрүүлж,  Хангарьд уралдаандаа Амин хонгор үрээгээ аман хүзүүдүүллээ, сэтгэл өөдрөг байна аа.
-Амин хонгор үрээний удам угшил урьд нь яаж уралдаж байсан бэ?
-Амин хонгор үрээ Сүхбаатар аймгийн Халзан сумын Галбаатарын унаган адуу. Улсын бүсэд нэг түрүүлж, нэг айрагдаж, Өмнөговь аймгийн 80 жилд айрагдаж,  Есөн зүйлийн наадамд айрагдаж байсан.  Манай цагаан азарганы төрсөн дүү.
-Бүсийн хоёр том уралдаанд та хэдэн насны хэдэн хүлэгтэй ирсэн бэ?
-Манай гал дээд таван насны 10 адуутай ирсэн.  Нэг түрүү, нэг аман хүзүү хүртэж, хоёр шүдлэн  20 гаргачихла.  Бүгд эсэн мэнд сайхан наадлаа.
-Улсад зартай Тэргүүн хонгор энэ жил хаана уяагдаж, хэд уралдсан бэ?
-Цогтцэций сумандаа уяагаа тааруулсан. Анхны уралдаанаа Дүнжингаравт уралдаж сайхан наадлаа. Сунгаанаа тэндээ хийсэн азаргатай сунгахад өнгөндөө байсан. Энхболдын хүрэн азарга манайхан нэг жүчээнд байдаг.  Хүрэн азарга сунгаанаа цуг хийчихээд хэд хоногийн өмнө "Ажнай" галын уралдаанд ирж аман хүзүүдэж, "Дүнжингарав-2014" уралдаандаа хоёулаа сайхан түрүүлсэнд баяртай байна.  Манай говийнхон  энэ жил их өнгөтэй сайхан наадмаа эхэлж  байна.  "Дүнжингарав"-ын уралдааны 3 түрүү, 4 айргийг  говийнхон хүртлээ.
-Энэ жил гал байгуулсан гэсэн. Галынхаа талаар яриач. Хэдэн хүний бүрэлдэхүүнтэй вэ?
-Модон морин жилийн босгон дээр  “Тэнүүн говийн хурд” нэртэй  гал байгуулсан. Манай галын тэргүүнээр Дундговь аймгийн Эрдэнэдалай  сумын  уугуул Лантуугийн Алтанхуяг ажилладаг.  Гишүүнээр яруу найрагч Нямбуугийн Баянмөнх, дуучин, СТА Эрдэнэсүрэнгийн Төрмандах,  Батпүрэвийн  Цолмонбаяр, аймгийн Алдарт уяач Адъяагийн Мөнхбаяр, Дэлгэрсайхан, манай аав  Дэмчигцоодол,  ах Эрдэнэбулган, тэгээд миний бие гэсэн 10-аад хүний бүрэлдэхүүнтэй  байна. "Тэнүүн говийн хурд"  гал байгуулагдсанаас хойш  9 түрүү, 11 айраг хүртээд байна даа.
-Дүнжингарав наадам тов нь тодорхойгүй байснаас уяачид морьдоо их тулгаж барьсан. Таны хувьд?
-Дүнжингарав наадамд ер нь уралдана гээд зорьчихсон байсан. Тэгээд болж магадгүй гэхээр нь морьдоо барьчихаад, болохгүй гэнэ гэхлээр нь тавьчихаад, чих тавьж хүлээгээд л байсан.  Ер нь бэлтгэлтэй хүлээж  байгаад тулгаж сонсоод ирсэн .Үрээний минь уяа сайхан байж одтой  наадлаа.
-Дүнжингарав уралдаан тодорхой шалтгааны улмаас хавар оройхон болж байна. Хавар орой болж байгаагийн давуу болон сул талыг та юу гэж харж байна?
-Хаврын эхэн сард Дүнжингаравыг говиос зорьж ирэхэд цас ихтэй, халтиргаатай, говийн бидэнд хангайд их хүйтэн байдаг, уралдаж ирсэн морьд бээрэхээс авахуулаад асуудал их байдаг бол энэ жил тийм зүйл багатай байлаа.  Хавар орой болохоор газрын хөрс суларчихсан, тоос ихтэй юм. Бусдаар ярих юмгүй сайн наадам боллоо.
-Наадмын зохион байгуулалтын талаар?
-Дүрэм журмаа нарийн барьж,  нас өгсөж уралдуулахгүй, эрлийз, монголоо сайхан ялгаж байна. Монгол адуугаараа монгол уламжлалараа сайхан уралдахыг би дэмждэг. Гэхдээ адууныхаа чанарыг сайжруулсан хүний буруу гэж юу байхав. Эрлийзийг ангилалд нь сайхан уралдуулах хэрэгтэй.
-Ярилцсан танд баярлалаа.  Дараа дараагийн уралдаан болгонд торгон жолоо өргүүлэх болтугай.
-За баярлалаа, ерөөлөөр болох болтугай.  Танай хамт олонд ажлын өндөр амжилт хүсье.
Ц.Амарбаяр